नेपाल कम्युनिस्ट पार्टी (नेकपा)को सचिवालय बैठक बुधबार पनि बस्दैछ । प्रधानमन्त्री निवास बालुवाटारमा नेकपाको सचिवालय बैठक बुधबार दिउँसो ३ बजेका लागि बोलाइएको छ ।

बैठकमा तल्ला तहको पार्टी एकता, जिम्मेवारी बाँडफाँट, सरकारको कामकारबाहीको समीक्षालगायतका एजेण्डामा छलफल हुने नेकपा स्रोतले जानकारी दियो । आईतबार र सोमबारको बैठकमा पार्टीको आन्तरिक विवाद प्रदेश पदाधिकारी चयनलगायतका विषयमा छलफल भएको र थप विषयमा छलफल गर्न बैठक बोलाइएको जनाइएको छ ।

‘पार्टी एकता, प्रदेश जिम्मेवारी बाँडफाँट, स्थायी कमिटि बैठकका ऐजेण्डालगायतका विषयमा छलफल हुनेछ,’ नेकपाका प्रवक्ता नारायणकाजी श्रेष्ठले भने । बैठकले कार्तिक १२ र १३ गते बस्ने भनिएको स्थायी किमिटी बैठकको ऐजेण्डासमेत तय गर्नेछ । स्थायी कमिटी बैठकले पार्टीको तल्ला तहको एकीकरण प्रक्रिया टुंगो लगाउने भनिएको छ ।

त्यसपछि कार्यकर्ता तथा जनपरिचालनसम्बन्धी योजना पनि बनाउने छ । तत्कालीन एमाले र माओवादी केन्द्रबीच गत जेठ ३ गते एकता भएको थियोे ।

केन्द्र्रमा एकता भएर नेकपा बने पनि तल्ला कमिटीहरुको एकता अझैसम्म पनि हुन सकेको छैन । जसका कारण पार्टीका गतिविधिमा प्रत्यक्ष असर परेको नेकपाकै नेताहरुले बताउँदै आएका छन् ।

त्यस्तै प्रदेश इञ्चार्ज, अध्यक्ष र सचिवको जिम्मेवारी तोकिए पनि त्यसमा विवाद देखिएको छ । माधव नेपाल समूहले त्यसमा चर्काे असन्तुष्टि जनाउँदै आएको छ । उक्त विवाद सल्टाउन सचिवालय बैठक बोलाइएको हो ।

वरिष्ठ नेता माधवकुमार नेपालले लिखित रुपमा पेश गरेको असहमतिको बारेमा भने आइतबार र सोमबारको बैठकमा छलफल भएको थियो ।

कार्तिक महिनाभित्र प्रदेश, जिल्ला, स्थानीय तह र वडा कमिटीसम्मको एकीकरण टुंगो लगाउने तालिका बनाएको नेकपाले मंसिरदेखि अभियान सञ्चालन गर्ने तयारी गरेको छ । पार्टी र सरकारविरुद्ध विभिन्न माध्यमबाट आक्रमण भइरहेको भन्दै नेकपाले संगठनलाई अझ शसक्त पार्न र कम्युनिष्ट एकताको लहर सिर्जना गर्ने अभियान सुरु गर्न लागेको नेताहरुले बताएका छन् ।

प्रकाशित समय ११:०५ बजे