१३औँ दक्षिण एसियाली खेलकुद (साग)अन्तर्गत ब्याडमिन्टनको पुरुष तथा महिला टिम इभेन्टमा नेपालले कास्य पदकमै चित्त बुझाएको छ । पोखरा रंगशालास्थित कभर्ड हलमा सोमबार भएको खेलमा नेपालका महिला तथा पुरुष दुवै टोली श्रीलंकासँग पराजित भएपछि नेपाल कास्यमा सीमित भएको हो । श्रीलंका फाइनलमा प्रवेश गरेको छ ।

श्रीलंकाले पुरुषतर्फ नेपाललाई ३–१ को सेटमा तथा महिलातर्फ ३–० को सेटमा पराजित गरेको थियो । पुरुषतर्फ नेपालका रत्नजित तामाङ श्रीलंकाका निशान पेर करुनारत्नेसँग २२–२० र २१–९ का सोझो सेटमा पराजित भए ।

त्यस्तै नेपालका दिपेश धामी श्रीलंकाका सचिन प्रेमाशन अन्गोडा भिडानेजसँग २४–२२, १८ –२१ र १६ –२१ सेटमा पराजित भए । यसैगरी अर्को खेलमा रञ्जित तामाङ र दिपेश धामीको जोडीलाई थरिन्डु डि डुम्बुकोला गुनाथिलाके र सचिन प्रेमासन अन्गोडा भिडानेजले ११–२१ र १५–२१ को सोझो सेटमा पराजित गरे ।

नेपालका लागि भने प्रिन्स दाहालले सान्त्वना जित निकाले । प्रिन्सले श्रीलंकाका रन्थुस्का ससिन्डु करुणाथिलाकेलाई २१–१८, १९–२१ र २१–१९ को सेटमा पराजित गरे पनि नेपाललाई फाइनलमा पु¥याउन असमर्थ रहे ।

पाकिस्तानलाई हराउँदै भारत पुरुष टिम इभेन्टमा फाइनल प्रवेश गरेको छ । भारतले पाकिस्तानलाई सोझो सेटमा पराजित गर्दै श्रीलंकासँगको स्वर्ण पदकका लागि भिडन्त पक्का गरेको हो । भारतका श्री साइ सिरिल बर्मा अल्लुरीले पाकिस्तानका अवेइस जाहिदलाई २१–७, २१–७ को सोझो सेटमा पराजित गरे ।

अर्को खेलमा भारतका कृष्णप्रसाद गरंगाले पाकिस्तानका अलि मुरादलाई २१–१९ र २१–१८ र तेस्रो खेलमा भारतका अरुण जर्जले पाकिस्तानका राजा मोहम्मद हुसेनलाई २१–१२ र २१–१२ को सेटमा पराजित गरे ।

महिलातर्फको सेमीफाइनल खेलमा नेपालकी नङ्शाल तामाङ श्रीलंकाकी थिलिनी प्रोमाडिकासँग २–२१ र १६–२१ को सोझो सेटमा, अनुमाया राई डिल्मी प्रेम्सिकासँग ८–२१ र ८–२१ को सेटमा तथा सीमा राजवंशी अचिनी निमलेशीका रथनासिरीसँग १२ –२१ र ८–२१ को सेटमा पराजित हुँदै परिणाम सुम्पिए । विजयी श्रीलंका फाइनलमा प्रवेश गरेको छ ।

त्यस्तै आजै भएको अर्को सेमीफाइनल खेलमा भारतले पाकिस्तानलाई ३–० को सेटमा पराजित गर्दै फाइनलमा प्रवेश गरेको छ । भारतकी साइ उत्तेजिथा रावले पाकिस्तानकी महुर शाहजादलाई २१–१२ र २१–१८, गायत्री गोपीचन्दले पल्वाशा बशीरले २१–१४ र २१–११ तथा स्रियंशी प्रदेशीले गजला सिद्दिकीलाई २१–१४ र २१–१२ को सेटमा पराजित गरे ।

महिला तथा पुरुष दुवैतर्फको फाइनल खेल आजै साँझ ६ बजे हुनेछ ।

प्रकाशित समय १६:१४ बजे