किशोरी बलात्कार आरोपमा पोखरा उपत्यका नगर विकास समितिका अध्यक्ष एवं पर्यटन व्यवसायी सुन्दरकुमार श्रेष्ठ पक्राउ परेका छन् । उनीसंगै एक १६ बर्षीया किशोरीमाथि यौन दुर्ब्यवहार गरेको आरोपमा एनआइसी एशिया बैंकका पर्स्याङ शाखा प्रमुख सुवास सुवेदी समेत पक्राउ परेका छन् ।

अध्यक्ष श्रेष्ठलाई उनकोे होटल दी कान्तिपुरबाट र सुवेदीलाई बैंकबाटै प्रहरीले नियन्त्रणमा लिएको वडा प्रहरी कार्यालय बैदामका प्रहरी प्रमुख डिएसपी कोमल शाहले बताए । उनीहरुलाई प्रहरीले किशोरीले दिएको बयानको आधारमा र उजुरीको आधारमा शुक्रबार पक्राउ गरेको हो । उनीहरु हाल जिल्ला प्रहरी कार्यालय कास्कीको हिरासतमा छन् । होटल दि कान्तिपुरका संचालक समेत रहेका श्रेष्ठले आफूलाई पटकपटक बलत्कार गरेको भनी किशोरीले प्रहरीलाई दिएको बयानमा उल्लेख गरिएको श्रोतले दावी गरेको छ । साथै किशोरीका आफन्तले श्रेष्ठविरुद्ध बलत्कार र सुवेदीविरुद्ध दुर्ब्यवहार आरोपमा उजुरी दिएका हुन् ।

पढ्नको लागि एक घरमा करिब ७ बर्षदेखि काम गर्दैै आएकी किशोरी कक्षा ८ मा अध्ययरत छात्रा हुन् । बिहिबारदेखि सम्पर्कविहिन भएकी किशोरीको खोजी कार्यमा प्रहरी र स्थानिय लागेका थिए । उनी भोलिपल्ट शुक्रबार बिहान सम्पर्कमा आएकी थिइन् । पटक पटक बलत्कार र यौन दुब्र्यवहारपछि पिडाले मर्ने मनसाय वोकेर घर छाडी हिडेको उनले साथीलाई बताएकी थिइन् ।

प्रकाशित समय ०७:०९ बजे