कर्णाली प्रदेश सरकारका भूमि व्यवस्था, कृषि तथा सहकारीमन्त्री विमला केसी सवार गाडी सोमबार बेलुका छिन्चुबाट वीरेन्द्रनगर सुर्खेतका लागि गुडिरहेको थियो । भेरीगंगा नगरपालिकाको सत्तरी भन्ने ठाउँमा सडकको छेउमा राखेको स्थानीय जातको केरामा उनको आँखा पुग्यो । चालकलाई गाडी रोक्न भनिन् । गाडी गतिमा भएकाले रोक्न खोजेको ठाउँभन्दा १०० मिटर टाढा गएर रोकियो ।

गाडी रोकिएपछि दुई अपरिचित आठ/नौ वर्षका बालिका आएर हामीलाई सुर्खेत लगिदिनोस्, हामी तपाईंलाई पैसा दिन्छौँ भन्दै चालकलाई गुहारे । चालकसँग ती बालिकाको आग्रह सुनेपछि मन्त्री केसीको ध्यान गयो । उनले दुवैलाई बोलाएर सोधिन्, ‘नानी कहाँ हो घर ? तिमी दुवै यतिबेला कहाँ जाने हो ? तिमीसँग कोही छैन त ! किन तिमी दुवै यतिखेर एक्लै हिँडेको ?’

तीमध्ये एक बालिकाले आत्तिँदै भनिन्, ‘हाम्रो घर भर्‍याङ खोरियो हो । त्यहाँबाट तीन घण्टा हिँडेर आएको । हामी सुर्खेत बसपार्क मामाकहाँ जाने हो ।’ अन्य प्रश्नको भने उनले उत्तर दिन चाहिनन् ।

मन्त्री केसीले फेरि सोधिन्, ‘तिम्रो मामाको नाम के हो ?’

बालिकाले भनिन्, ‘थाहा छैन ।’

‘तिम्रो घरमा बुबाआमा हुनुहुन्न ? सानै छौं, तिमीहरु भागेर आएजस्तो लाग्छ,’ उनले प्रतिप्रश्न गरिन् ।

आत्तिँदै बालिकाले रुँदै घरमा कान्छी आमा भएको र उनले गाली गर्ने गरेको सुनाइन् । हातमा प्लास्टिकको झोलामा केही लत्ताकपडा बोकेकी ती बालिकाले तारन्तार ‘पैसा दिन्छु, मामाघर पुर्‍याइदिनु’ भन्दै आग्रह गरिरहिन् ।

बाँकी प्रश्नको उत्तर नदिएपछि मन्त्रीले ‘ठिकै छ तिमीहरुलाई प्रहरीकहाँ बुझाउँछौँ’ भनिन् । यो सुन्नेबित्तिकै दुवै भाग्न खोजे । पछि उनले सम्झाइबुझाई गरेर उनीहरुलाई गाडीमा राखिन् ।

दुई सय मिटरअघि पुगेपछि सबैजना गाडीबाट ओर्लिए । संयोगवशः त्यहाँनेर दुवै बालिका अध्ययनरत मनिरामकाँडा आधारभूत विद्यालय भेरीगंगा नगरपालिका १ सुर्खेतका शिक्षिका ललिता बुढा क्षेत्री भेटिइन् । उनले यी दुई बालिका भागेर गएको सुन्दा तिनलाई कसरी भेटाउने होला भनेर गाडी कुरेर बसेको बताइन् ।

मन्त्री केसीले शिक्षिका बुढा क्षेत्रीलाई दुवै बालिकाको नाम, वतन, ठेगाना सोधिन् । उनको प्रश्नको जवाफमा शिक्षिका बुढा क्षेत्रीले दुवै बालिका भेरीगंगा नगरपालिका १ भर्‍याङ खोरिया सुर्खेतका ९ वर्षीया दुर्गा सिंह र १० वर्षीया सुकमाया गुरुङ रहेको जानकारी दिइन् । उनका अनुसार दुर्गा मनिराकाँडा आधारभूत विद्यालय कक्षा ४ र सुकमाया कक्षा ३ मा अध्ययनरत छन् । उनले दुवै बालिकाले ३५० रुपैयाँ बोकेको र परीक्षा नदिई भागेको र परिवारले उनीहरुलाई खोजी गरिरेहको जानकारी गराइन् ।

शिक्षिका बुढा क्षेत्री विद्यालयबाट बिदा लिएर सुर्खेत पुग्न करिब तीन घण्टाको पैदलयात्रा गरेर राजमार्गमा बेलुका ५:४० बजे पुगेकी थिइन् । साँझ परिसकेको र बालिकालाई घर पुर्‍याउन नसकिने भन्दै मन्त्री केसीले बालिकालाई वीरेन्द्रनगरसम्म उद्धार गरेर शिक्षिका बुढाक्षेत्रीको जिम्मा लगाइन् ।

उनले शिक्षिका बुढा क्षेत्रीलाई घरपरिवारलाई राम्रोसँग सम्झाएर बालिकालाई बुझाउन र उनीहरुलाई कुनै पनि मानसिक, शारीरिक र मनोवैज्ञानिक पीडा एवं तनाव नदिन सुझाव दिइन् । यद्यपि उनीहरुको सही व्यवस्थापन गर्न नसकिए तुरुन्त जानकारी गराउन पनि आग्रह गरेकी छन् । (रासस)

प्रकाशित समय ०७:४२ बजे