बजारमा अत्यावश्यक वस्तुको कृत्रिम अभाव सिर्जना गरेर कालोबजारी गर्ने जोकोहीलाई पनि नछाड्ने महानगरीय प्रहरी आयुुक्त डीआइजी विश्वराज पोखरेलले बताएका छन् । अहिले भइरहेको असहज परिस्थितको बेला दुई पैसाको लागि कालोबजारी गर्नुभन्दा समाजसेवामा लाग्न उनले आग्रह गरे ।

‘कोरोनाका कारण मास्क, स्यानीटाइजर, ग्यास लगायतका सामग्रीको अभाव सिर्जना गराएर कालोबजारी गर्ने व्यक्ति, व्यवसायी, व्यापारी सबैलाई कडा कारवाही हुन्छ,’ उनले भने । कानुनअनुसार कालोबजारी गर्नेलाई १ वर्ष जेल र २ लाख ५० हजार रुपैयाँसम्म जरिवाना हुने उनले जानकारी दिए । नेपाल प्रहरी यस परिस्थितिमा गम्भिर भएर लागेको र कुनै पनि हालतमा कालोबजारी गर्नेसँग सम्झौता नगर्ने उनको भनाइ छ ।

कोरोना नभित्रिए पनि सर्वसाधारणमा मनोवैज्ञानिक त्रास बढेकाले यस्तो बेला हल्लाको पछि लाग्नुभन्दा आफ्नो भूमिकाबारे सोच्न डीआईजी पोखरेलले आग्रह गरे । यदि नेपालमा कोरोना संक्रमण भइहाले सबैले आफ्नो ठाउँबाट जिम्मेवारीपुर्वक भूमिका निर्वाह गर्नुपर्ने र नेपाल प्रहरीले पनि आफ्नो कर्तव्य निभाउने उनले प्रतिबद्धता जनाए ।

‘बजारमा अहिले जताततै देखिएको समस्या भनेको सर्जिकल मास्कको हो । सर्वसाधारणहरु बढी मूल्यमा मास्क किन्न बाध्य छन् । यसलाई रोक्न प्रहरी सक्रियताका साथ लागिरहेको छ । नागरिकहरुले कालोबजारी भएको सूचना दिएमा उक्त ठाउँमा प्रहरीले तुरुन्त कारवाही गर्छ,’ उनले भने । कोरोना भाइरबारे उच्च सतर्कता अपनाउन उनले सबैमा अनुरोध गरे ।

नेपालमा कोरोनाको संक्रमण भइहाले जोखिम मोलेर भए पनि देश र जनताको सेवाका लागि नेपाल प्रहरी तयार रहेको डीआईजी पोखरेलले बताए । यदि कसैमा कोरोना देखिएमा जाँच गराइहाल्न, आफै सचेत रहन तथा परिवारको माया र साथ खोज्नुको साटो आइसोलेसनमा बस्न उनले सबैलाई अनुरोध गरे ।

‘सरकारले धोका दिइरहेको छ’

डा. सुन्दरमणि दिक्षितले नेपालमा कोरोनाको जाँच नै नगरी ‘कोरोना छैन’ भनेर कोरोनालाई भित्रभित्रै लुकाउन खोजेको आरोप लगाएका छन् । कोरोना संक्रमणको आशंका गरी वीर अस्पतालबाट रेफर गरिएको व्यक्तिलाई टेकु अस्पतालले जाँचै नगरी घर पठाइएको उनको दावी थियो । सरकारले कोरोनाको विषयमा लापरबाही गरिरहेको उनले आरोप लगाए ।

‘कोरोना परीक्षण गर्न पठाउँदा इन्फ्ल्यून्जाको परीक्षण गर्ने अनि कोरोना छैन भनेर पठाउने यो सरकारको लापरवाही हो,’ आक्रोश पोख्दै उनले भने, ‘सरकारले जनतालाई भ्रममा राखिरहेको छ । धोका दिइरहेको छ ।’ यसैगरी वेवास्ता गरिरहने हो भने एकदिन कोरोनाले सबैलाई सखाप पार्ने उनले बताए । यसबारे सबैले आवाज उठाउन उनले आग्रहसमेत गरेका छन् ।

प्रकाशित समय १७:४८ बजे