विश्वभर कोरोनाभाइरस (कोभिड १९) संक्रमणको आशंकामा परीक्षण दर तीव्र गतिमा बढाइँदै जाँदा गम्भीर बिरामी हुनेको संख्या भने घट्दै गएको छ । विगतमा सामान्य अवस्थाका संक्रमित ९४ प्रतिशत र गम्भीर अवस्थाका संक्रमित ६ प्रतिशत रहेकोमा अहिले सो अनुपात घटेर ९७:३ मा झरेको छ ।

परीक्षण दर उच्च रुपमा बढेको छ । नेपाली समयअनुसार मंगलबार बिहानसम्ममा अमेरिकाले मात्रै ४० लाख मानिसको परीक्षण गरेको छ । जसमा ७ लाख ९२ हजार ८५९ संक्रमित फेला परेका छन् । तीमध्ये ४२ हजार ५१४ जनाको मृत्यु भइसकेको छ । ७२ हजार ३८९ जना सफल उपचारपछि घर फर्किसकेका छन् । ६ लाख ७७ हजार ८५६ जनाको उपचार भइरहेकोमा १३ हजार ९५१ जना गम्भीर छन् ।

त्यस्तै रूसले २० लाख ५३ हजार, जर्मनीले १७ लाख १८ हजार, इटालीले १३ लाख ९८ हजार, स्पेनले ९ लाख ३० हजार, यूएईले ७ लाख ९० हजार, क्यानडाले ५ लाख ५९ हजारभन्दा बढीको परीक्षण गरेका छन् । चीनले भने परीक्षण स्थिति सार्वजनिक नगरेको वर्ल्डोमिटरले जनाएको छ ।

भारतमा ४ लाख १ हजार ५८६ जनाको परीक्षण गर्दा १८ हजार ५३९ संक्रमित फेला परेका छन् । तीमध्ये ५९२ जनाको मृत्यु भइसकेको छ भने ३ हजार २७३ उपचारपछि घर फर्किसकेका छन् । १४ हजार ६७४ जनाको उपचार भइरहेको छ । भारतमा कोही पनि गम्भीर बिरामी परेका छैनन् ।

नेपालले पनि परीक्षण दर उच्च रुपमा बढाएको छ । सोमबार बेलुकासम्ममा नेपालमा २९ हजार ५६७ जनाको परीक्षण गरिएकोमा ३१ संक्रमित पुष्टि भएका छन् । तीमध्ये चार जना उपचारपछि घर फर्किएका छन् । २७ जनाको उपचार भइरहँदा कसैको अवस्था गम्भीर नरहेको स्वास्थ्य मन्त्रालयले जनाएको छ ।

यसैबीच, कोरोना संक्रमणबाट २४ घण्टामा ५ हजार ३ सयभन्दा बढीको मृत्यु भएको छ । विश्वभर कोरोना संक्रमितको संख्या २४ लाख ८१ हजार नाघेको छ भने १ लाख ७० हजार ४२५ ले ज्यान गुमाइसकेका छन् ।

प्रकाशित समय ०७:५१ बजे