विश्वभर महामारीको रुपमा फैलिएको कोरोना भाइरसका कारण एकै दिनमा एक लाख २५ हजारभन्दा बढी नयाँ संक्रमित थपिएपछि कूल संक्रमितको संख्या ६० लाख नाघेको छ । गएको २४ घण्टामा मात्रै एक लाख २५ हजार ५११ जना नयाँ संक्रमित थपिएपछि कूल संक्रमितको संख्या ६० लाख २६ हजार ४१८ पुगेको हो ।

विश्व स्वास्थ्य संगठनका अनुसार गएको २४ घण्टामा मात्रै विश्वभर चार हजार ८१२ जनाको ज्यान गएको छ । यो समाचार तयार पार्दासम्म विश्वभर अहिलेसम्म तीन लाख ६६ हजार ४२१ जनाले ज्यान गुमाएको स्वास्थ्य संगठनले जनाएको छ । कूल संक्रमितमध्ये २६ लाख ५६ हजार १४४ जनाको सफल उपचार भएको छ भने ३० लाख तीन हजार ८५३ जनाको उपचार भइरहेको छ । उपचाररतमध्ये ५३ हजार ७३५ जनाको अवस्था चिन्ताजनक रहेको छ ।

सबैभन्दा बढी फैलिएको अमेरिकामा गएको २४ घण्टामा मात्रै एक हजार २१२ जनाको ज्यान गएको छ भने २५ हजारभन्दा बढी नयाँ संक्रमित थपिएका छन् । अहिलेसम्म अमेरिकामा १७ लाख ९३ हजार ५३० जनामा संक्रमण देखिएको छ भने एक लाख चार हजार ५४२ जनाको ज्यान गएको छ । त्यस्तै संक्रमितमध्ये पाँच लाख १९ हजार ५६९ जनाको सफल उपचार भएको छ । त्यस्तै ११ लाख ६९ हजार ४१९ जनाको उपचार भइरहेको छ ।

ब्राजिल पनि कोरोनाको प्रकोप बढी फैलिएको दोस्रो देशको सूचीमा परेको छ । अहिलेसम्म ब्राजिलमा चार लाख ६८ हजार ३३८ जनामा संक्रमण देखिएको छ । गएको २४ घण्टामा मात्रै २९ हजार ५२६ जनामा नयाँ संक्रमित थपिएका छन् भने एक हजार १८० जनाले ज्यान गुमाएका छन् । अहिलेसम्म ब्राजिलमा भाइरस संक्रमणबाट करिब २८ हजारको ज्यान गएको विश्व स्वास्थ्य संगठनले जनाएको छ ।

प्रकाशित समय ०७:४६ बजे