विश्वभर कोरोना भाइरस संक्रमितको संख्या ९० लाख नजिक पुगेको छ । गएको २४ घण्टामा मात्रै एक लाख ६१ हजारभन्दा बढी संक्रमण देखिएपछि संक्रमितको संख्या ८९ लाख १३ हजार ५२४ पुगेको हो ।

विश्व स्वास्थ्य संगठनका अनुसार ज्यान गुमाउनेको संख्या पनि चार लाख ६६ हजार नाघेको छ । गएको २४ घण्टामै पाँच हजारको ज्यान गएपछि मृतकको संख्या चार लाख ६६ हजार ६८४ पुगेको हो । त्यस्तै संक्रमितमध्ये ४७ लाख ३७ हजार ९५१ जना उपचारपछि घर फर्किएका छन् भने ३७ लाखभन्दा बढी संक्रमितको उपचार भइरहेको छ ।

सबैभन्दा बढी प्रकोप फैलिएको अमेरिकामा एक लाख २१ हजार ९८० जनाले ज्यान गुमाएका छन् भने २३ लाख ३० हजार ५७८ जनामा संक्रमण देखिएको छ । त्यस्तै ९ लाख ७२ हजार ९४१ जना उपचारपछि घर फर्किएका छन् भने १२ लाख ३५ हजार ६५७ जनाको उपचार भएको छ ।

अमेरिका पछिकै सबैभन्दा बढी प्रकोप फैलिएको ब्राजिलमा १० लाख ७० हजारभन्दा बढी व्यक्तिमा भाइरस देखिएको छ भने ५० हजारभन्दा बढीले ज्यान गुमाएका छन् । ब्राजिलमा अहिलेसम्म पाँच लाख ४३ हजार १८६ जना डिस्चार्ज भएका छन् भने चार लाख ७६ हजारको उपचार भइरहेको छ ।

त्यस्तै रसियामा पनि कोरोना भाइरस संक्रमितको संख्या पाँच लाख ७६ हजार ९५२ पुगेको छ भने आठ हजारले ज्यान गुमाएका छन् । त्यस्तै तीन लाख ३४ हजारको डिस्चार्ज भएका छन् भने दुई लाख ३४ हजारको उपचार भइरहेको छ ।

प्रकाशित समय ०८:०९ बजे