विश्वभर महामारीको रुपमा फैलिएको कोरोना भाइरस एक करोड ६४ लाख १८ हजार ८६७ जनामा पुगेको छ ।

विश्व स्वास्थ्य संगठनका अनुसार विश्वभर ६ लाख ५२ हजार २५६ जनाले ज्यान गुमाएका भने एक करोड ४७ हजार ३०४ जना भाइरस जितेर घर फर्किसकेका छन् ।

वितेका २४ घण्टामा मात्रै विश्वभर दुई लाख २१ हजार २६० नयाँ संक्रमित थपिएका छन् भने चार हजार ३०३ जनाले ज्यान गुमाएको वर्ल्डोमिटरको तथ्यांकले देखाएको छ ।

सबैभन्दा बढी प्रकोप फैलिएको अमेरिकामा मात्रै गएको २४ घण्टामा ५६ हजार १३० नयाँ संक्रमित थपिएका छन् । योसँगै अमेरिकामा संक्रमितको संख्या ४३ लाख ७१ हजार ८३९ पुगेको अमेरिकी स्वास्थ्य विभागले जनाएको छ ।

अमेरिकापछिकै दोस्रो बढी प्रकोप फैलिएको ब्राजिलमा २३ हजार ४६७ जना एकै संक्रमित थपिएका छन् । त्यस्तै भारतमा अहिलेसम्मकै बढी व्यक्तिमा संक्रमण देखिएको छ ।

वितेका २४ घण्टामा अमेरिकामा थप ४५१ जनाले भाइरसबाट ज्यान गुमाएका छन् । योसँगै अमेरिकामा ज्यान गुमाउनेको संख्या एक लाख ४९ हजार ८४९ पुगेको छ । त्यस्तै ब्राजिलमा थप ५५६ जनाले ज्यान गुमाएका छन् भने अहिलेसम्म ब्राजिलमा ज्यान गुमाउनेको संख्या ८७ हजार ५२ पुगेको छ ।

प्रकाशित समय ०९:५४ बजे