विश्वभर कोरोना संक्रमितको संख्या दुई करोड २८ लाख नाघेको छ । गएको २४ घण्टामा मात्रै दुई लाख ७८ हजार जनामा संक्रमण पुष्टि भएपछि कुल संक्रमितको संख्या दुई करोड २८ लाख ६१ हजार ६८८ पुगेको हो ।

विश्व स्वास्थ्य संगठनका अनुसार विश्वभर कोरोनाका कारण ज्यान गुमाउनेको संख्या पनि सात लाख ९७ हजार पुगेको छ । गएको २४ घण्टामा मात्रै करिब ७ हजार जनाको ज्यान गएपछि मृतकको संख्या सात लाख ९७ हजार १०५ पुगेको हो । त्यस्तै एक करोड ५ लाख संक्रमित डिस्चार्ज भएका छन् ।

कुल संक्रमितमध्ये ६५ लाख ४७ हजार ८४६ जनाको उपचार भइरहेको छ भने ६१ हजार ८५१ जनाको स्वास्थ्य अवस्था चिन्ताजनक रहेको विश्व स्वास्थ्य संगठनले जनाएको छ । सबैभन्दा बढी संक्रमित भएको अमेरिकामा ५७ लाख ४६ हजार संक्रमित पुगेका छन् । गएको २४ घण्टामा मात्रै ४५ हजार ३४१ जनामा संक्रमण देखिएपछि कुल संक्रमितको संख्या ५७ लाख ४६ हजार २७२ पुगेको छ ।

अहिलेसम्म अमेरिकामा ज्यान गुमाउनेको संख्या एक लाख ७७ हजार नाघेको त्यहाँको स्वास्थ्य विभागले जनाएको छ । विभागका अनुसार बिहीबार मात्रै एक हजार ९० जनाले ज्यान गुमाएका छन् । त्यस्तै ३० लाख ९५ हजारको सफल उपचार भएको छ भने २४ लाख ७३ हजारको उपचार भइरहेको छ ।

ब्राजिलमा पनि कोरोना संक्रमितको संख्या ३५ लाख नाघेको छ । गएको २४ घण्टामा मात्रै ४४ हजार ६८४ जनामा संक्रमण देखिएपछि कुल संक्रमितको संख्या ३५ लाख पाँच हजार ९७ पुगेको हो । त्यस्तै ज्यान गुमाउनेको संख्या एक लाख १२ हजार ४२३ पुगेको छ । पछिल्लो एकै दिनमा मात्रै ब्राजिलमा एक हजार २३४ जनाले ज्यान गुमाएका थिए ।

भारतमा कोरोना संक्रमितको संख्या २९ लाख नाघेको छ । गएको २४ घण्टामा मात्रै करिब ७० हजारको संख्यामा संक्रमित थपिएपछि संक्रमितको संख्या २९ लाख चार हजार पुगेको हो । त्यस्तै ज्यान गुमाउनेको संख्या पनि ५४ हजार ९७५ पुगेको छ । बिहीबार मात्रै ९८१ जनाले ज्यान गुमाएका थिए ।

प्रकाशित समय १०:३० बजे