विश्वभर कोरोनाबाट ज्यान गुमाउनेको संख्या १० लाख नजिक पुगेको छ । गएको २४ घण्टामा मात्रै करिब साढे पाँच हजार संक्रमितको ज्यान गएपछि मृतकको संख्या ९ लाख ९८ हजार ७२१ पुगेको हो ।

विश्व स्वास्थ्य संगठनका अनुसार अहिलेसम्म तीन करोड ३० लाखभन्दा बढी व्यक्तिमा भाइरस संक्रमण भएको छ । गएको २४ घण्टामा मात्रै तीन लाख संक्रमित थपिएका थिए । अहिलेसम्म दुई करोड ४४ लाखभन्दा बढी संक्रमितको सफल उपचार भएको छ भने ७६ लाख ५० हजारको उपचार भइरहेको छ । उपचाररतमध्ये पनि ६५ हजार ३०४ जना संक्रमितको स्वास्थ्य अवस्था चिन्ताजनक रहेको विश्व स्वास्थ्य संगठनले जनाएको छ ।

सबैभन्दा बढी संक्रमण फैलिएको अमेरिकामा कोरोना संक्रमितको संख्या ७२ लाख ८७ हजार नाघेको छ । गएको २४ घण्टामा मात्रै अमेरिकामा ४३ हजार २०६ जना संक्रमित थपिएका थिए भने ७३७ जनाको ज्यान गएको थियो । योसँगै अमेरिकामा अहिलेसम्म ज्यान गुमाउनेको संख्या दुई लाख ९ हजार १७७ पुगेको छ । त्यस्तै ४५ लाख २४ हजार संक्रमितको सफल उपचार भएको छ भने २२ लाख ५४ हजार संक्रमितको उपचार भइरहेको छ ।

वर्ल्डोमिटरको तथ्यांकअनुसार सबैभन्दा दोस्रो ठूलो संक्रमण फैलिएको देशको रुपमा भारत देखिएको छ । भारतमा अहिलेसम्म कोरोना संक्रमितको संख्या ६० लाख नजिक पुगेको छ । गएको २४ घण्टामा मात्रै भारतमा ८९ हजार संक्रमित थपिएका थिए । योसँगै कुल संक्रमितको संख्या ५९ लाख ९० हजार पुगेको छ ।

भारतीय स्वास्थ्य विभागका अनुसार अहिलेसम्म भारतमा ९४ हजार ५३४ जनाको ज्यान गएको छ । शनिबार मात्रै भारतमा एक हजार १२४ जनाले ज्यान गुमाएका छन् । त्यस्तै ४९ लाख ३८ हजार संक्रमित डिस्चार्ज भएका छन् भने ९ लाख ५७ हजार संक्रमितको उपचार भइरहेको छ ।

ब्राजिलमा कुल संक्रमितको संख्या ४७ लाख १८ हजार नाघेको छ । गएको २४ घण्टामा मात्रै ब्राजिलमा २५ हजार संक्रमित थपिएका थिए । त्यस्तै अहिलेसम्म एक लाख ४१ हजार ४४१ जनाले कोरोनाबाट ज्यान गुमाएका छन् भने ४० लाख ५० हजारको सफल उपचार भएको छ । बाँकीको उपचार भइरहेको विश्व स्वास्थ्य संगठनले जनाएको छ ।

प्रकाशित समय ०९:२४ बजे