म्याग्दीको धवलागिरि गाउँपालिका–५ मल्कबाङ घर भई प्रवासमा रहेका स्थानीयवासीले छिमेकी गाउँ मराङका पहिरो पीडितलाई चार लाखभन्दा बढी रूपैयाँ आर्थिक सहयोग गरेका छन् । सामाजिक अभियानकर्मी रविन्स घरब्जा छन्त्यालको अगुवाइमा कतार, जापान, मेलेशिया र अष्ट्रेलियामा रहेका मल्कबाङ र मलम्पारवासीबाट सहयोग संकलन गरी चार लाख २१ हजार १९० रूपैयाँ सहयोग गरेका हुन् । सो सहयोग रकममध्ये मल्कबाङ हेल्थ पोष्टमा कार्यरत सिनियर अनमी जगदेवी छन्त्यालले १० हजार रूपैयाँ सहयोग गरेका थिए ।

सङ्कलित रकम शनिबार एक कार्यक्रमका बीच पीडित परिवारलाई हस्तान्तरण गरिएको समन्वयकर्ता हरि छन्त्यालले बताए । राहत रकममध्ये धवलागिरि गाउँपालिका–६ मराङका २१ जना मृतकका आफन्तलाई १२ हजार रूपैयाँका दरले राहत दिइएको छ । त्यसैगरी बाढीपहिरोले पूर्ण क्षति भएका १३ घरधुरीलाई सात हजार रूपैयाँका दरले र आंशिक क्षति भएका १२ जनालाई पाँच हजार रूपैयाँका दरले राहत दिइएको थियो । त्यसैगरी स्थानीय गाउँमा अपाङ्गता भएका पाँच जनालाई एक हजार ५०० रूपैयाँका दरले सहयोग गरिएको छ ।

वितरण गरिएको सहयोग रकम जुटाउन मल्कबाङ घर भएर प्रवासमा रहेका युवा रविन्स घरब्जा छन्त्यालले समन्वय गरेका थिए । छन्त्यालको सक्रियतामा कतारबाट एक लाख ७८ हजार ८०० रूपैयाँ, धन छन्त्यालको सक्रियतामा अष्टेलियामा एक लाख १९० रूपैयाँ, देवेन्द्र छन्त्याल र चित्र छन्त्यालको सक्रियतामा जापानबाट एक लाख २२ हजार ३९३ रूपैयाँ सहयोग संकलन भएको थियो ।

प्रकाशित समय ०९:१८ बजे