विश्वभर कोरोना भाइरसका कारण १० लाख ८१ हजारभन्दा बढी संक्रमितको ज्यान गएको छ । गएको २४ घण्टामा मात्रै करिब ४ हजारको ज्यान गएपछि मृत्यु हुनेको संख्या १० लाख ८१ हजार ४३५ पुगेको हो ।

विश्व स्वास्थ्य संगठनका अनुसार अहिलेसम्म विश्वभर तीन करोड ७७ लाखभन्दा बढी व्यक्तिमा भाइरस संक्रमण देखिएको छ । आइतबार मात्रै दुई लाख ८७ हजार व्यक्तिमा भाइरस संक्रमण देखिएपछि कुल संक्रमितको संख्या तीन करोड ७७ लाख ४६ हजार ५१ पुगेको छ ।

वर्ल्डोमिटरको तथ्यांकअनुसार गत जनवरी २२ देखि संक्रमण सुरु भएयता दुई करोड ८३ लाख ४७ हजार ३३० जना संक्रमित डिस्चार्ज भएका छन् भने सक्रिय संक्रमितको संख्या ८३ लाख १७ हजार पुगेको छ । त्यस्तै ६८ हजार संक्रमितको स्वास्थ्य अवस्था चिन्ताजनक रहेको विश्व स्वास्थ्य संगठनले जनाएको छ ।

सबैभन्दा बढी संक्रमण फैलिएको अमेरिकामा ८० लाखको हाराहारीमा संक्रमण देखिएको छ । गएको २४ घण्टामा मात्रै ४१ हजार ९३५ जनामा संक्रमण देखिएपछि संक्रमितको कुल संख्या ७९ लाख ९१ हजार ९९८ पुगेको हो । त्यस्तै दुई लाख १९ हजार ६९५ जनाले भाइरसका कारण ज्यान गुमाएका छन् ।

अहिलेसम्म अमेरिकामा ५१ लाख २८ हजार संक्रमित डिस्चार्ज भएका छन् भने २६ लाख ४४ हजारको उपचार भइरहेको छ । दोस्रो बढी संक्रमित देश भारतमा कोरोना संक्रमितको संख्या ७१ लाख १९ हजारभन्दा बढी पुगेको छ । गएको २४ घण्टामा मात्रै ६७ हजार ७५७ जनामा संक्रमित थपिएका हुन् ।

भारतमा कोरोना संक्रमण फैलिएयता अहिलेसम्म एक लाख ९ हजारभन्दा बढीको ज्यान गएको छ । गएको २४ घण्टामा मात्रै ८१३ जनाको ज्यान गएसँगै मृत्यु हुनेको संख्या एक लाख ९ हजार १८४ पुगेको हो । त्यस्तै ६१ लाख ४६ हजार संक्रमित डिस्चार्ज भएका छन् भने आठ लाख ६३ हजार संक्रमितको उपचार भइरहेको छ ।

प्रकाशित समय ०९:३९ बजे