जनपद तथा प्राविधिक प्रहरीतर्फको विभिन्न पदमा पदोन्नति भएका ३१ जना प्रहरी अधिकृतलाई दर्ज्यानी चिह्न प्रदान गरिएको छ । प्रहरी महानिरीक्षक (आईजीपी) शैलेश थापा क्षेत्रीले प्रहरी प्रधान कार्यालयमा बिहीबार आयोजित एक समारोहबीच पदोन्नति भएका ३० जना अधिकृतलाई दर्ज्यानी चिह्न लगाइदिएका हुन् ।

दर्ज्यानी चिह्न पाएकाहरूमा प्रहरी नायब उपरीक्षक (डीएसपी)बाट प्रहरी उपरीक्षक (एसपी) पदमा १५ जना, प्राविधिक प्रहरी नायब उपरीक्षक (डीएसपी)बाट प्राविधिक प्रहरी उपरीक्षक (एसपी) पदमा १ जना र प्राविधिक प्रहरी निरीक्षक (इन्स्पेक्टर)बाट प्राविधिक प्रहरी नायब उपरीक्षक (डीएसपी) पदमा १५ जना गरी ३१ जना प्रहरी अधिकृत रहेका छन् । साथै सोही मितिको निर्णयअनुसार प्रहरी नायव उपरीक्षक (डीएसपी)बाट प्रहरी उपरीक्षक (एसपी) पदमा पदोन्नति भएका १ जना हाल सुडान डार्फरस्थित एफपीयू मिसनमा कार्यरत रहेका छन् ।

समारोहमा आईजीपी थापा क्षेत्रीले पदोन्नति भएका प्रहरी अधिकृतहरुलाई बधाई दिँदै पदोन्नतिसँगै प्राप्त नयाँ जिम्मेवारीलाई मनन् गर्दै थप सजगता र सतर्कता अपनाउदै कार्य सम्पादन गर्न निर्देशन दिए । नेपाल सरकारद्वारा घोषित निर्वाचनप्रति संवेदनशील भई सुरक्षालाई थप मजबुत बनाउनतर्फ केन्द्रित हुनुपर्नेमा उनले जोड दिए ।

नागरिकसँगको सहकार्यमा प्रहरीले असल भावका साथ कार्य सम्पादन गर्नुपर्ने चर्चा गर्दै आईजीपी थापा क्षेत्रीले आचरण एवं व्यवहारमा प्रहरी सदैव संवेदनशील हुनुपर्ने बताए । संगठनले अंगीकार गरेको नीति तथा प्रणालीप्रति सबै प्रहरी कर्मचारीहरु पदिय दायित्व अनुसार एक्यवद्ध भई अगाडि बढ्नुपर्नेमा उनले जोड दिए ।

उक्त अवसरमा पदोन्नति भएका प्रहरी अधिकृतहरुको तर्फबाट मन्तव्य व्यक्त गर्दै एसपी ऋषिराम कँडेलले संगठनले लिएको उद्देश्य प्राप्तिका लागि सदैव एक्यबद्ध भई नयाँ उर्जाका साथ काम गर्ने प्रतिबद्धता व्यक्त गरे ।

प्रकाशित समय १७:५४ बजे