हालै दिबंगत भएका चर्चित न्युरो सर्जन डा. उपेन्द्र देवकोटाकी जेठी मेघा देवकोटा पनि अपहरणमा परेकी थिईन् । पूर्व मन्त्रीसमेत रहेका देवकोटाको काठमाडौंंकै घरबाट छोरीको फिल्मी शैलीमा अपरहण भएको थियो । फिल्मी शैलीमा भएको त्यो अपहरणपछि राजधानीको सुरक्षा व्यवस्था फितलो भएको भन्दै व्यापक बहस चल्दै आएको छ ।

काडाघारीबाट अपहरणमा परेका बालक निशान खड्का मृत फेला परेपछि शुरक्षामा प्रश्न उठाउदै राजधानीबासी थप त्रसित छन् । यो पीडादायी खवर सुन्नुपर्दा एक दश अघिको राजधानीको मेघा ‘अपहरण काण्ड’ले फेरी सबैलाई झस्काएको छ । २०६५ सालमा अपहरणमा परेकी डाक्टर देवकोटाकी जेठी छोरी मेघा हाल डक्टर छिन् । त्यतिबेला उनी अपहरणकारीको पञ्जाबाट सकुशल उम्कन सफल भईन् । अपहरण हुँदा मेघा रातो बंगला स्कूलमा १० कक्षामा पढ्थिन । अहिले २६ बर्षकी उनी त्यतिबेला १६ वर्षकी थिइन् ।

यसरी भएको थियो, मेघाको अपहरण
२०६५ साल साउन १८ गते मध्यरात दुई बजे हेपाली हाइटस्थित देवकोटाको घरमा ६ जनाको समूहमा अपहरणकारी प्रवेश गरे । ६ जनाको मास्क लगाएको हतियारसहितका अपहरणकारी ‘कम्पाउण्ड’ नाघेर भित्र छिरे । घरको माथिल्लो तल्ला उक्लिएपछि डा. उदेवकोटाकी छोरी मेघालाई नियन्त्रणमा लिए । त्यसपछि डा. देवकोटाको बेडरुममा प्रवेश गरेका अपरहणकारीले १० करोड रुपैयाँ बार्गेनिङ गरे ।

अपहरणकारी कम्पाउन छिर्नासाथ टेलिफोन र विजुलीको लाईन काटिदिएका थिए । घरमा भएका मोबाइल फोनहरू पनि पानीमा डुबाइदिएका थिए । दश करोड रुपैया माग भएपछि देवकोटाले तत्काल आफूसँग नभएको बताए । लचिलो बन्दै अपहरणकारीले केही दिनपछी दिए हुने बताए । तर एउटा शर्त राखे । शर्त थियो, पैसा नजुटुन्जेलसम्म परिवारको एकजना सदस्य आफूहरुसँगै जानुपर्ने । डा. देवकोटाले आफू र श्रीमतीलाई सँगै लैजान अनुरोध गरे । तर अपहरणकारीले मानेनन् । उनीहरुले भने, ‘तपाईलाई लगेपछि कसले पैसा म्यानेज गर्छ ?’ डा. देवकोटाले भने, ‘दुई छोरीहरु छन् जसरी पनि खोजेर ल्याउछन् ?’

यो सुनेपछि जेठी छोरी मेघाले बावुआमासँग भनिन्, ‘यिनीहरुसँग मै जान्छु , तपाईहरु नजानुहोस् ।’ मेघाले सम्झाए पनि डा. देवकोटाले सुरुमा मानेनन् । अपहरणकारीसँग को जाने ? र कति पैसा दिने ? भन्ने बार्गेनिङ गर्दा–गर्दै साढे २ घण्टा वित्यो । उनीहरुले पैसा नजुटुन्जेलसम्मलाई जेठी छोरीलाई सँगै लैजाने बताए । विहानको पौने ५ भएको थियो । झरी परेर आकाश खुलेकोले झिमिसे उज्यालो भैसकेको थियो । अपहरणकारीहरुले डा. देवकोटाकै गाडी प्रयोग गरेर मेघालाई अपरहण गरेर लगे । अपहरणमा प्रयोग गरिएको देवकोटाको गाडी उनीहरुले चावहिलमा छाडिदिए र अर्काे गाडी प्रयोग गरे ।

छोरीलाई अपहरणकारीले लगेपछि डा. देवकोटाले तुरुन्त प्रहरीलाई सूचना दिए । यसलगत्तै प्रहरीले एआइजीको नेतृत्वमा अनुसन्धान थाल्यो । प्रहरीलाई जानकारी दिए मेघालाई मारिदिने धम्की दिएकाले प्रहरीले घटना बाहिर सार्वजनीक गरेन । डा. देवकोटाका परिवारले पनि कसैलाई भनेनन् । गोप्य रुपमा अपहरणकारीको उपत्यकाभरी खोजी भयो ।

अपहरणको भोली पल्टै हेम मगरलाई प्ररहीले पक्राउ गरेको थियो । अनुसन्धानको क्रममा मेघालाई बन्धक बनाएर राखिएको घरसमेत पत्ता लागेको थियो । साउन २२ गते पाटनस्थित एक घरमा प्रहरीले घेराउ पनि गर्याे । तर प्रहरीले आक्रमण गरेमा मेघालाई मारिदिने अपहरणकारीले धम्की दिए । त्यसपछि प्रहरीले केही गरेन । तर प्रहरीले जुनसुकै समयमा आक्रमण वा नियन्त्रणमा लिन सक्ने आशंकामा अपहरणकारीले फिरौती रकम घटाए । जति समय लम्बियो उति प्रहरीको फन्दामा पर्ने सभावना बढी रहेको आँकलन गर्दै अपहरणकारीले १० करोड नभई एक करोड ३० लाख भए मेघालाई छाडिदिने बताए । त्यसपछि सोही राति पैसा तयार गरेर डा. देवकोटा पैसा पुर्याउन गए । रातको ११ बजे एक करोड तीस लाख रुपैयाँ दिएपछि, अपहरणकारीले मेघालाई गौशालामा ल्याएर छाडे ।

प्रहरीका अनुसार हेम मगर, सिद्धार्थ लामा, राजु लामा, केशव दर्लामी मगर, राजु थापा, गोकुल गिरी र कृष्ण राई अपहरणमा संलग्न थिए । उनीहरुमध्ये अपहरणका मुख्य दोषी भनिएका राजु थापालाई जिल्ला अदालत काठमाडौले गएको बैशाख १२ गते १७ वर्ष कैद सुनाएको छ । २६ लाख २३ हजार जरिवाना सुनाएको छ । अपहरणमा संलग्न कृष्ण राईबाहेक अहिले सबैले अपहरण, फिरौती असुल र डाँका मुद्दामा सजाय काटिरहेका छन् ।

त्यति बेला अपहरणमा परेकी डाक्टर देवकोटाकी जेठी छोरी मेघा हाल लण्डनको किंग्स कलेजमा अध्ययनरत छिन् । स्वर्गिय डा. देवकोटाका तीन छोरी मेघा, बसुधा र मञ्जरी हुन् । उनीहरु सबै डक्टर हुन् । डा. देवकोटाको गएको असार ४ गते दिवगत भएपछि तिनै छोरीहरुले काजक्रिया गरेका थिए ।

प्रकाशित समय १८:२२ बजे