प्रधानमन्त्री केपी शर्मा ओलीले सरकारको लक्ष्यअनुसार विकास निर्माण कार्यले तीव्रता पाउन नसकेको बताएका छन् । आइतबार राष्ट्रिय विकास समस्या समाधान समितिको ४७औं बैठकमा उनले विकासको गति सुस्त भएको भन्दै मन्त्रीहरूसँग असन्तुष्टि व्यक्त गरे ।

उनले मुलुकलाई अहिले तीव्र विकास आवश्यक रहेको उल्लेख गर्दै त्यसअनुसार काम गर्न मन्त्री, सचिव तथा आयोजना प्रमुखहरूलाई निर्देशन दिए । उनले भने, ‘हामीलाई तीव्र विकास चाहिएको छ, अब सबैले यसमा ध्यान दिनुपर्छ ।’

केही राम्रा काम पनि भए पनि समग्रमा सन्तोष गर्ने ठाउँ नभएकाे प्रधानमन्त्री ओलीको भनाइ थियो । ‘पुँजीगत खर्च अत्यन्त कम भयो, वैदेशिक लगानीका आयोजना पनि ढिला भए । आयोजना जति ढिलो भयो, प्रतिफल पनि ढिलै प्राप्त हुन्छ,’ उनले असन्तुष्टि पोखे ।

त्यसलगत्तै उनी आफ्नो स्वास्थ्यमा समस्या आएको भन्दै बैठकबाट बाहिरिएका थिए । ‘मेरो स्वास्थ्यमा केही समस्या आएकोले म अब बैठकबाट बाहिरिन्छु । अब बैठक आयोगको उपाध्यक्षज्यूको अध्यक्षतामा सञ्चालन हुनेछ र बैठकमा उठेका विषयमा उपप्रधामन्त्री ईश्वर पोखरेलले जवाफ दिनुहुनेछ,’ उनले भने ।

प्रकाशित समय १८:५६ बजे