विश्वभर कोरोना संक्रमितको संख्या साढे ३५ लाख नाघेको छ । गएको २४ घण्टामै ८१ हजारभन्दा बढी नयाँ संक्रमित थपिएपछि संक्रमितको संख्या बढेको हो ।

विश्व स्वास्थ्य संगठनका अनुसार विश्वभर कोरोना संक्रमितको संख्या ३५ लाख ६२ हजार ७५९ पुगेको छ । गएको २४ घण्टामा मात्रै ८१ हजार ३३० जना नयाँ संक्रमित थपिएका हुन् । अहिलेसम्म ज्यान गुमाउनेको संख्या पनि दुई लाख ४८ हजार नाघेको छ । एकै दिन तीन हजार ४५१ पुगेपछि मृतकको संख्या दुई लाख ४८ हजारभन्दा बढी पुगेको हो ।

वर्ल्डोमिटरको तथ्यांकअनुसार विश्वभरका संक्रमितमध्येमा ११ लाख ५३ हजार ७१ जनाको सफल उपचार सफल भएको छ भने २१ लाख ६१ हजार ५७२ जना उपचाररत छन् । तीमध्ये पनि ५० हजार ४३ जनाको अवस्था गम्भीर रहेको स्वास्थ्य संगठनले जनाएको छ ।

सबैभन्दा बढी फैलिएको अमेरिकामा भने मृतकको संख्या घट्दै गएको देखिन्छ । दैनिक तीन हजार जनाको मृत्यु हुँदै आएको अमेरिकामा अहिले ज्यान गुमाउनेको संख्या एक हजारको हाराहारीमा पुग्ने गरेको छ । गएको २४ घण्टामा मात्रै एक हजार १३७ जनाको ज्यान गएको छ भने २६ हजार ७३६ जनामा नयाँ संक्रमण देखिएको छ ।

यो समाचार तयार पार्दासम्म अमेरिकामा ज्यान गुमाउनेको संख्या ६८ हजार ५८१ पुगेको छ भने ११ लाख ८७ हजार ५१० जनामा संक्रमण फैलिएको छ । संक्रमितमध्ये एक लाख ७८ हजार २६३ जनाको सफल उपचार भइसकेको छ भने ९ लाख ४० हजारभन्दा बढी उपचाररत छन् ।

प्रकाशित समय ०८:०७ बजे