विश्वभर महामारीको रुपमा फैलिएको नोबेल कोरोना भाइरसका कारण ज्यान गुमाउनेको संख्या दुई लाख ५८ हजार नाघेको छ । गएको २४ घण्टामा मात्रै पाँच हजार ७८७ जनाले ज्यान गुमाएपछि मृत्यु हुनेको संख्या दुई लाख ५८ हजार २७ पुगेको हो ।

बुधबार बिहानसम्म विश्वभर ३७ लाख २४ हजार ५११ जनामा कोरोनाको संक्रमण देखा परेको छ । गएको २४ घण्टामा मात्रै ८१ हजार २४० जनामा नयाँ संक्रमण देखिएको विश्व स्वास्थ्य संगठनले जनाएको छ ।

चीनको वुहानबाट विश्वभर फैलिएको कोरोना भाइरस संक्रमित १२ लाख ४० हजारभन्दा बढीको सफल उपचार भएको छ । यो समाचार तयार पार्दासम्म विश्वभर डिस्चार्ज हुनेको संख्या १२ लाख ४० हजार ७०५ पुगेको छ । त्यस्तै २२ लाख २५ हजार ७७९ जना उपचारत छन् भने ४९ हजार २५६ जनाको स्वास्थ्य अवस्था गम्भीर रहेको विश्व स्वास्थ्य संगठनले जनाएको छ ।

सबैभन्दा बढी अमेरिकामा फैलिएको भाइरस अहिले साढे १२ लाखमा पुगेको छ । गएको २४ घण्टामा मात्रै २४ हजार ७९२ जना नयाँ संक्रमित फेला परेपछि संक्रमितको संख्या १२ लाख ३७ हजार ६२७ पुगेको हो । त्यस्तै ज्यान गुमाउनेको संख्या ७२ हजार २७१ पुगेको छ । अमेरिकाका एकै दिनमा दुई हजार ३५० पुगेको छ भने दुई लाख ६२६ जना उपचारपछि घर फर्किएका छन् ।

प्रकाशित समय ०७:१० बजे