विश्वभर कोरोना भाइरस संक्रमित १७ लाख ५५ हजार १४० जना उपचारपश्चात् घर फर्किएका छन् भने २५ लाखभन्दा बढी व्यक्तिको उपचार भइरहेको छ ।

विश्व स्वास्थ्य संगठनका अनुसार गत जनवरी २२ देखि विश्वभर फैलँदै आएको कोरोना भाइरस अहिलेसम्म ४६ लाख २१ हजार ४०६ जनामा देखिएको छ । त्योमध्ये २५ लाख ५८ हजार ११२ जना उपचाररत रहेका छन् ।

एकै दिनमा मात्रै ९९ हजार ३९७ जना भाइरस संक्रमण देखिएपछि ४६ लाख भन्दा बढी पुगेको हो । गएको २४ घण्टामा मात्रै पाँच हजार ७२ जनाको मृत्यु भएपछि ज्यान गुमाउनेको संख्या तीन लाख आठ हजार १५४ पुगेको हो ।

वर्ल्डोमिटरको तथ्यांकअनुसार ४५ हजार ८ जना कोरोना संक्रमितको अवस्था गम्भीर देखिएको छ । सबैभन्दा बढी फैलिएको अमेरिकापछि रसियामा पनि भाइरसको प्रकोप फैलँदै गएको छ ।
रसियामा गएको २४ घण्टामा मात्रै १० हजार ५९८ जनामा नयाँ संक्रमण देखिएपछि संक्रमितको संख्या दुई लाख ६२ हजार ८४३ पुगेको छ ।

रसियामा एकैदिनमा ११३ जनाको ज्यान गएपछि मृत्यु हुनेको संख्या दुई हजार ४१८ पुगेको छ ।
अहिले रसियामा ५८ हजार २२६ जनाको उपचारपछि घर फर्किसकेका छन् भने दुई लाख दुई हजार १९९ जनाको उपचार भइरहेको छ भने २३ सय जनाको अवस्था चिन्ताजनक रहेको छ ।

प्रकाशित समय ०७:५९ बजे