विश्वव्यापी रुपमा फैलिएको कोरोना भाइरस संक्रमण भएका १८ लाखभन्दा बढी व्यक्तिको सफल उपचार भएको छ । विश्व स्वास्थ्य संगठनका अनुसार सोमबार बिहानसम्म १८ लाख ५६ हजार ५६६ जनाको सफल उपचार भएको छ ।

भाइरसका कारण ज्यान गुमाउनेको संख्या पनि बढ्दै गएको छ । गएको २४ घण्टामा मात्रै तीन हजार ६१७ जनाले ज्यान गुमाएपछि विश्वभर मृत्यु हुनेको संख्या तीन लाख १६ हजार ५१९ पुगेको हो । वर्ल्डोमिटरको तथ्यांकअनुसार अहिलेसम्म कोरोना संक्रमितको संख्या ४८ लाख नाघेको । एकै दिनमा ८४ हजार ५०१ जना नयाँ संक्रमित देखिएपछि कूल संक्रमितको संख्या ४८ लाख एक हजार ५१० पुगेको हो । संक्रमितमध्ये २६ लाख २६ हजार १८१ जनाको उपचार भइरहेको छ भने ४४ हजार ८२३ जनाको अवस्था चिन्ताजनक रहेको स्वास्थ्य संगठनले जनाएको छ ।

सबैभन्दा बढी फैलिएको अमेरिकामा भने ज्यान गुमाउनेको संख्या घटेको छ । दैनिक रुपमा २५ सयभन्दा बढी नागरिक गुमाउदै आएको अमेरिकामा अहिले साढे आठ सयसम्म पुगेको छ । अमेरिकामा अहिलेसम्म १५ लाख २७ हजार ६६४ जनामा कोरोना भाइरसको संक्रमण देखा परेको छ भने ९० हजार ९७८ जनाले ज्यान गुमाइसकेका छन् । गएको २४ घण्टामा मात्रै अमेरिकामा १९ हजार ८९१ जना संक्रमित थपिए भने ८६५ जनाले ज्यान गुमाएका छन् ।

अमेरिकामा कूल संक्रमितमध्ये तीन लाख ४६ हजार ३८९ जनाको सफल उपचार भइसकेको छ भने १० लाख ९० हजार २९७ जना उपचाररत छन् । त्यस्तै १६ हजार ३५५ जनाको अवस्था भने गम्भीर देखिएको स्वास्थ्य संगठनले जनाएको छ ।

प्रकाशित समय ०८:०६ बजे