विश्वभर कोरोना संक्रमितको संख्या ५० लाख ८२ हजार नाघेको छ । गएको २४ घण्टामा मात्रै ९९ हजार ७२३ जना नयाँ संक्रमित थपिएपछि कूल संक्रमितको संख्या ५० लाख ८२ हजार ६६० पुगेको हो । त्यस्तै बिहीबार बिहानसम्म कोरोना संक्रमित ज्यान गुमाउनेको संख्या पनि निकै बढेको देखिन्छ ।

वर्ल्डोमिटरको तथ्यांकअनुसार एकै दिनमा मात्रै चार हजार ७४० जनाले ज्यान गुमाएका छन् । अहिलेसम्म विश्वभर तीन लाख २९ हजार २९४ जनाले ज्यान गुमाएको विश्व स्वास्थ्य संगठनले जनाएको छ । बुधबारको तुलनामा बिहीबार करिब दुई सयभन्दा बढी व्यक्तिले ज्यान गुमाएका छन् । संक्रमितमध्ये २० लाख २० हजार १५७ जनाको सफल उपचार भएको छ भने २७ लाख ३३ हजार २०९ जनाको उपचार भइरहेको स्वास्थ्य संगठनले जनाएको छ । त्योमध्ये पनि ४५ हजार ८०३ जनाको अवस्था चिन्ताजनक रहेको बताइएको छ ।

सबैभन्दा बढी प्रकोप फैलिएको अमेरिकामा गएको २४ घण्टामा मात्रै एक हजार ४६१ जनाले ज्यान गुमाएका छन् भने २१ हजार ४०८ जना नयाँ संक्रमित थपिएका छन् । अहिलेसम्मको तथ्यांक हेर्दा अमेरिकामा १५ लाख ९१ हजार ९९१ जना संक्रमित देखिएका छन् भने ९४ हजार ९९४ जना संक्रमितको ज्यान गएको छ । त्यस्तै तीन लाख ७० हजार ७६ जनाको सफल उपचार भइसकेको छ भने ११ लाख २६ हजार ९२१ जनाको उपचार भइरहेको छ । उपचार भइरहेकामध्ये पनि १७ हजार ८१५ जनाको अवस्था गम्भीर रहेको स्वास्थ्य संगठनले जनाएको छ ।

प्रकाशित समय ०६:५७ बजे