विश्वभर तीन लाख ९६ हजारभन्दा बढी कोरोना संक्रमितको मृत्यु भएको छ । गएको २४ घण्टामा मात्रै दुई हजार ८२६ जनाको ज्यान गएपछि मृत्यु हुनेको संख्या तीन लाख ४६ हजार ४३४ पुगेको हो ।

विश्व स्वास्थ्य संगठनका अनुसार सोमबार बिहानसम्म विश्वभर ५४ लाख ९४ हजार ४५५ जनामा कोरोना संक्रमण देखिएको छ । जसमध्ये २२ लाख ९९ हजार ३४५ जनाको सफल उपचार भएको छ भने २८ लाख ४८ हजार ६७६ जनाको उपचार भइरहेको छ । उपचार भइरहेका मध्येहरुमा पनि ५३ हजार २२४ जनाको अवस्था गम्भीर रहेको संगठनले जनाएको छ ।

वर्ल्डोमिटरको तथ्यांकअनुसार अहिलेसम्म सबैभन्दा बढी अमेरिकामा प्रकोप देखिएको छ । अमेरिकामा अहिलेसम्म १६ लाख ८६ हजारभन्दा बढी संक्रमित देखिएका छन् भने ९९ हजार तीन सयको ज्यान गएको छ । त्यस्तै संक्रमितमध्ये चार लाख ५१ हजार ७०२ जनाको सफल उपचार भएको छ भने ११ लाख ३५ हजार ४३४ जनाको उपचार भइरहेको छ ।

ब्राजिलमा अहिलेसम्म तीन लाख ६३ हजार ६१८ जना संक्रमित देखिएका छन् भने २२ हजार ७१६ जनाको ज्यान गएको छ । त्यस्तै एक लाख ४९ हजार ९११ जनाको सफल उपचार भइसकेको छ भने एक लाख ९० हजार ९९१ जनाको उपचार भइरहेको जनाइएको छ । त्यस्तै रसियामा पनि संक्रमितको संख्या तीन लाख ४४ हजार ४८१ पुगेको छ भने तीन हजार ५४१ जनाको ज्यान गएको विश्व स्वास्थ्य संगठनले जनाएको छ ।

प्रकाशित समय ०८:०५ बजे