विश्वभर एकै दिन कोरोना संक्रमित एक लाखभन्दा बढी थपिएका छन् । गएको २४ घण्टामा मात्रै विश्वभर पाँच हजार २८३ जनाको ज्यान गएको छ भने एक लाख ६ हजार ४७५ जना नयाँ संक्रमित थपिएका हुन् ।

विश्व स्वास्थ्य संगठनका अनुसार विश्वभर कोरोना संक्रमितको संख्या अहिलेसम्म ५७ लाख नाघेको छ । यो समाचार तयार पार्दासम्म कोरोना संक्रमितको संख्या ५७ लाख ८४ हजार ६०३ पुगेको छ । त्यस्तै ज्यान गुमाउनेको संख्या तीन लाख ५६ हजार ९३७ पुगेको छ ।

वर्ल्डोमिटरको तथ्यांकअनुसार कूल संक्रमितमध्ये २४ लाख ९४ हजार ९५६ जनाको सफल उपचार भएको छ भने २९ लाख ३२ हजार ७१० जनाको उपचार भइरहेको स्वास्थ्य संगठनले जनाएको छ त्यस्तै उपचाररतमध्ये पनि ५२ हजार ९७३ जनाको अवस्था गम्भीर रहेको विश्व स्वास्थ्य संगठनले जनाएको छ ।

सबैभन्दा बढी प्रकोप फैलिएको अमेरिकामा फेरि मृतकको संख्या थपिएको छ । केही दिन यता दैनिक रुपमा पाँच सयको हाराहारीमा नागरिक गुमाउँदै आएको अमेरिकाले फेरि एक हजारभन्दा बढीले ज्यान गुमाउँदै आएका छन् । गएको २४ घण्टामा मात्रै अमेरिकामा एक हजार पाँच सय ३५ जनाले ज्यान गुमाएका छन् भने २० हजार ५४६ जना नयाँ संक्रमित थपिएका छन् ।

अहिलेसम्म अमेरिकामा कोरोना संक्रमितको संख्या १७ लाख ४५ हजार नाघेको छ भने एक लाख दुई हजार १०७ जनाले ज्यान गुमाएका छन् । त्यस्तै चार लाख ९० हजार १३० जनाको सफल उपचार भएको छ भने ११ लाख ५३ हजार ५६६ जनाको उपचार भइरहेको विश्व स्वास्थ्य संगठनले जनाएको छ ।

प्रकाशित समय ०८:१७ बजे