गण्डकी प्रदेशमा सोमबार थप २० जनामा कोरोना संक्रमण पुष्टि भएको छ । यससँगै गण्डकी प्रदेशमा कोरोना संक्रमितको सख्या ५४० पुगेको हो ।

गण्डकी प्रदेशको स्याङ्जामा १२ र नवलपरासीमा ८ जनामा कोरोना संक्रमण पुष्टि भएको स्वास्थ्य निर्देशनालय गण्डकीका निर्देशक डा. विनोद विन्दु शर्माले जानकारी दिए । स्याङ्जाको अर्जुन चौपारी गाउँपालिकामा ८ जना पुरुष र २ जना महिलामा कोरोना संक्रमण पुष्टि भएको छ । उनीहरु ६ देखि ५० वर्ष उमेर समूहका रहेका छन् ।

यीमध्ये ३ जना ७ वर्षीय बालक र १ जना ६ वर्षीया बालिका रहेका छन् । त्यस्तै नवलपरासीको बौदिकाली गाउँपालिकामा ८ जना पुरुषमा कोरोना संक्रमण पुष्टि भएको गण्डकी स्वस्थ्य निर्देशनालयले जनाएको छ । उनीहरू १८ देखि ५० वर्ष उमेर समूहका पुरुष रहेका छन् ।

संक्रमित सबै भारतबाट आएका हुन् । संक्रमित सबै सम्बन्धित जिल्लाको क्वान्टिनमा रहेका छन् । उनीहरूलाई सम्बन्धित जिल्लाहरुमा रहेको आइसोलेसन कक्षमा लैजाने तयारी भैरहेको निर्देशक शर्माले जानकारी दिए । गण्डकी प्रदेशमा हालसम्म ५२ जना निको भएर घर फर्किएका छन् भने १ जनाको मृत्यु भएको छ ।

प्रकाशित समय ०८:१३ बजे