गण्डकी प्रदेशमा १२ महिने शिशुसहित थप ३२ जनामा कोरोना संक्रमण पुष्टि भएको छ । प्रदेश क्षयरोग केन्द्र, पोखरा राप्ती स्वास्थ्य विज्ञान प्रतिष्ठान दाङ र राष्ट्रिय जनस्वास्थ्य प्रयोगशाला काठामाडौंमा गरिएको परीक्षणमा थप ३२ जनामा संक्रमण देखिएको हो ।

शनिवारसम्म गण्डकी प्रदेशमा कोरोना संक्रमितको सख्या ८३८ पुगेको छ । गण्डकी प्रदेशको ३ जिल्ला अन्तर्गत बाग्लुङ ८, स्याङजामा २२ र नवलपरासीमा २ जनामा कोराना संक्रमण पुष्टि भएको स्वास्थ्य निर्देशनालय गण्डकीले जनाएको छ । बाग्लुङको ढोरपाटन नगरपालिकामा २५ वर्षीय पुरुषमा कोरोना संक्रमण पुष्टि भएको छ । बाग्लुङकै कोठेखोला गाउँपालिकामा ७ जना पुरुषमा कोरोना संक्रमण पुष्टि भएको छ । उनीहरु २० देखि ५० वर्ष उमेर समूहका रहेका छन् ।

त्यस्तै स्याङ्जाको पुतली नगरपालिका ४२ वर्षीय पुरुष, वालिङ नगरपालिकामा २६ वर्षीय पुरुष र विरुवा गाउँपालिकामा २३ वर्षीय पुरुषमा कोरोना संक्रमण पुष्टि भएको छ । अर्जुन चौपारी गाउँपालिकामा १३ जना पुरुष र ६ जना महिलामा कोरोना संक्रमण पुष्टि भएको गण्डकी प्रदेश निर्देशानालयले जनाएको छ । उनीहरु ८ देखि ४१ वर्ष उमेर समूहका रहेका छन् । जसमा १२ महिने शिशुुु, ८ र ९ वर्षीय बालक रहेका छन् ।

त्यसैगरी नवलपरासिको हुप्सेकोट गाउँपालिकामा २ जना वर्ष २६ र ४० का पुरुषमा कोरोना संक्रमण पुष्टि भएको छ ।  हुप्सेकोट गाउँपालिका र वालिङ नगरपालिकाका व्यक्तिहरु आइसोलेसनमा बसीसकेका छन् भने अन्य पालिकाका सबै व्यक्तिहरुलाई सम्बन्धित जिल्लाहरुमा रहेका आइसोलेसन कक्षमा लैजाने तयारी भैरहेको स्वास्थ्य निर्देशनालय गण्डकीका निर्देशक डा. विनोद विन्दु शर्माले जानकारी दिए ।

यससँगै गण्डकी प्रदेशमा हालसम्म १०१ जना निको भएर घर फर्केका छन् भने २ जनाको मृत्यु भएको छ ।

प्रकाशित समय ०९:१६ बजे