विश्वभर एकै दिनमा कोरोना भाइरसका कारण एक लाख ८० हजारभन्दा बढी संक्रमित थपिएका छन् । विश्व स्वास्थ्य सगठनका अनुसार बुधबार बिहानसम्म कूल संक्रमितको संख्या एक करोड पाँच लाख ८३ हजार ९३२ पुगेको छ ।

वर्ल्डोमिटरको तथ्यांकअनुसार भाइरसका कारण ज्यान गुमाउनेको संख्या पनि पाँच लाख १३ हजार नाघेको छ । एकै दिनमा पाँच हजारभन्दा बढी संक्रमितको ज्यान गएपछि मृतकको संख्या पाँच लाख १३ हजार ८६१ पुगेको हो । त्यस्तै ५७ लाख ९४ हजारभन्दा बढी संक्रमित उपचारपछि घर फर्किएका छन् भने ४२ लाखभन्दा बढीको उपचार भइरहेको छ ।

सबैभन्दा बढी प्रकोप फैलिएको अमेरिकामा २७ लाखभन्दा बढी व्यक्तिमा कोरोना संक्रमण देखिएको छ । गएको २४ घण्टामा मात्रै अमेरिकामा ४६ हजारभन्दा बढी संक्रमित थपिएपछि संक्रमितको संख्या २७ लाख २७ हजार ८५३ पुगेको हो । त्यस्तै अहिलेसम्म एक लाख ३० हजार १२२ जनाले ज्यान गुमाएका छन् ।

अमेरिकामा प्रकोप फैलिए यता ११ लाख ४३ हजार संक्रमितले कोरोना जितेका छन् भने १४ लाख ५४ हजारभन्दा बढीको उपचार भइरहेको छ । त्यसमा पनि उपचाररत् १५ हजार ९३५ जनाको स्वास्थ्य अवस्था गम्भीर रहेको बताइएको छ ।

ब्राजिलमा पनि कोरोना संक्रमितको संख्या १४ लाख नाघेको छ । गएको २४ घण्टामा मात्रै ३७ हजारभन्दा बढी थपिएपछि कुल संक्रमितको संख्या १४ लाख आठ हजार ४८५ पुगेको हो । त्यस्तै ब्राजिलमा ज्यान गुमाउनेको संख्या ५६ हजार ६५६ पुगेको छ । त्यस्तै सात लाख ९० हजारभन्दा बढीले कोरोना जितेका छन् भने पाँच लाख ५८ हजारभन्दा बढीको उपचार भइरहेको छ ।

प्रकाशित समय ०७:४७ बजे