विश्वका २१५ देशमा फैलिरहेको नोबेल कोरोना भाइरस (कोभिड १९) प्रकोप फैलिरहेको बेलामा कुनै कुनै देश भने संक्रमण मुक्त भइसकेका छन् । विश्व स्वास्थ्य संगठनका अनुसार अहिलेसम्म १७ देश संक्रमणमुक्त भइसकेका छन् ।

एक करोड ३४ लाख ५७ हजारभन्दा बढी व्यक्तिमा संक्रमण फैलिरहेको बेलामा १२ देशले भने मानवीय क्षति बेहोर्नुपरेको छैन । १२ देशहरुमा सतप्रतिशत कोरोना संक्रमित डिस्चार्ज भएका छन् ।

फेरो आइसल्यान्ड, टिमोरलिस्टे, ग्रेनाडा, न्युकालेडोना, लाओस्, डोमिनिका, फल्कल्यान्ड आइसल्यान्ड, ग्रीनल्यान्ड, भ्याटिकनसिटी, क्यारबियन नेदरल्यान्ड, साउथ बार्थ, अंगेलियामा संक्रमित सबै डिस्चार्ज भएका छन् । त्यस्तै विश्वका पाँच वटा देशहरु भने केही मानवीय क्षति भए पनि संक्रमणमुक्त भइसकेका छन् ।

वर्ल्डोमिटरको तथ्यांकअनुसार अहिलेसम्म पाँच लाख ८१ हजार २२१ जनाले ज्यान गुमाइसकेका छन् । ब्रिटिस भर्जिन आइसल्यान्डमा एक जनाको ज्यान गएको छ भने बाँकी ७ जना डिस्चार्ज भइसकेका छन् । त्यस्तै कुराकोमा एक जनाको ज्यान गएको छ भने बाँकी २४ जनालाई सञ्चो भइसकेको छ ।

कोरोनामुक्त हुने मुलुकमध्येको अर्को देश हो सिन्टमार्टेन । यो मुलुकमा ७८ जना संक्रमित थिए । जसमा १५ जनाको ज्यान गएको छ भने ६३ जनालाई सञ्चो भइसकेको छ । त्यस्तै ब्रुनाइमा १४१ जना संक्रमितमध्ये ३ जनाको ज्यान गएको छ भने १३८ जना डिस्चार्ज भइसकेका छन् । त्यस्तै इज्लेअफ म्यानमा २४ जनाको ज्यान गएको छ भने ३१२ जनाको सफल उपचार भएर कोरोनामुक्त भएको छ ।

प्रकाशित समय १०:५० बजे