विश्वभर कोरोना भाइरसलाई जितेर घर फर्कनेको संख्या एक करोड ४० लाख नजिक पुगेको छ । गएको २४ घण्टामा मात्रै करिब ६ हजार जनाले भाइरस जितेर घर फर्केपछि डिस्चार्ज हुनेको संख्या एक करोड ३९ लाख १७ हजार ८२७ पुगेको हो ।

विश्व स्वास्थ्य संगठनका अनुसार अहिलेसम्म विश्वभर कोरोना संक्रमितको संख्या दुई करोड १० लाख ६७ हजार ५२० पुगेको छ । गएको २४ घण्टामा मात्रै दुई लाख ९३ हजार जनामा संक्रमण पुष्टि भएको हो । त्यस्तै अहिले ६३ लाख ९६ हजार २०० को उपचार भइरहेको छ । उपचार भइरहेकामध्ये पनि साढे ६४ लाख संक्रमितको स्वास्थ्य अवस्था गम्भीर रहेको स्वास्थ्य संगठनले जनाएको छ ।

सबैभन्दा बढी प्रकोप फैलिएको अमेरिकामा कोरोना संक्रमितको संख्या ५४ लाख नाघेको छ । गएको २४ घण्टामा मात्रै अमेरिकामा ५५ हजार ३६४ जनामा संक्रमण पुष्टि भएसँगै कुल संक्रमितको संख्या ५४ लाख १५ हजार ६६६ पुगेको हो । त्यस्तै ज्यान गुमाउनेको संख्या पनि एक लाख ७० हजार ४१५ पुगेको छ ।

बिहीबार मात्रै अमेरिकामा एक हजार २८४ जनाले ज्यान गुमाएका छन् । त्यस्तै २८ लाख ४३ हजार २०४ जनाको सफल उपचार भएको छ भने २४ लाख दुई हजार ४७ जनाको उपचार भइरहेको अमेरिकी स्वास्थ्य विभागले जनाएको छ । ब्राजिलमा पनि कोरोना संक्रमितको संख्या ३२ लाख २९ हजार पुगेको छ भने ज्यान गुमाउनेको संख्या एक लाख पाँच हजार नाघेको छ । गएको २४ घण्टामा मात्रै ब्राजिलमा एक हजार ३०१ जनाको ज्यान गएपछि मृत्यु हुनेको संख्या एक लाख पाँच हजार ५६४ पुगेको हो ।

छिमेकी राष्ट्र भारतमा पनि कोरोनाको कहर फैलँदै गएको छ । गएको २४ घण्टामा मात्रै भारतमा ६४ हजार १४२ जनामा कोरोना संक्रमण देखिएको थियो । अहिलेसम्म संक्रमितको संख्या २४ लाख ५९ हजार ६१३ पुगेको भारतीय स्वास्थ्य विभागले जनाएको छ । बिहीबार मात्रै भारतमा एक हजार ६ जनाले ज्यान गुमाए । अहिलेसम्म भारतमा ज्यान गुमाउनेको संख्या ४८ हजार १४४ पुगेको छ ।

प्रकाशित समय ०९:३३ बजे