विश्वभर सक्रिय संक्रमितको संख्या ७० लाख नाघेको छ । त्यस्तै एकै दिनमा मात्रै करिब ६ हजार जना डिस्चार्ज भएका छन् । योसँगै डिस्चार्ज हुनेको संख्या एक करोड ९३ लाख ७३ हजार ७१४ पुगेको छ ।

विश्व स्वास्थ्य संगठनका अनुसार अहिलेसम्म दुई करोड ७२ लाख ८९ हजार जनामा कोरोना संक्रमण देखिएको छ । गएको २४ घण्टामा मात्रै दुई लाख ४० हजारको हाराहारीमा संक्रमित थपिएपछि कुल संक्रमितको संख्या दुई करोड ७३ लाख ८९ हजार ७२५ पुगेको हो ।

त्यस्तै अहिलेसम्म आठ लाख ८७ हजार ५५० जनाको ज्यान गएको छ भने एक करोड ९३ लाख ७३ हजार ७१४ जना संक्रमित उपचारपछि घर फर्केका छन् । त्यस्तै ७० लाख २८ हजार सक्रिय संक्रमित देखिएको विश्व स्वास्थ्य संगठनले जनाएको छ ।

सबैभन्दा बढी संक्रमण फैलिएको अमेरिकामा ६४ लाख ६० हजारभन्दा बढी व्यक्तिमा कोरोना संक्रमण देखिएको छ । गएको २४ घण्टामा मात्रै ३१ हजार ११० जनामा संक्रमण देखिएपछि कुल संक्रमितको संख्या ६४ लाख ६० हजार २५० पुगेको हो । त्यस्तै एक लाख ९३ हजारको ज्यान गएको छ । गएको २४ घण्टामा मात्रै अमेरिकामा ४३२ जनाले ज्यान गुमाएका छन् भने ३७ लाख २५ हजारको सफल उपचार भएको छ ।

सबैभन्दा बढी संक्रमित भएको देशको सूचीमा भारत देखिएको छ । ब्राजिलको भन्दा पनि बढी व्यक्तिमा संक्रमित थपिएपछि भारत दोस्रो बढी संक्रमित भएको देशको सूचीमा परेको हो । अहिले भारतमा सबैभन्दा उच्च संक्रमण देखिएको छ । गएको २४ घण्टामा मात्रै भारतमा ९१ हजार ७२३ जनामा संक्रमण देखिएपछि कुल संक्रमितको संख्या ४२ लाख दुई हजार ५६२ पुगेको हो ।

भारतीय स्वास्थ्य विभागका अनुसार अहिलेसम्म भारतमा ७१ हजारभन्दा बढीले ज्यान गुमाएका छन् । गएको २४ घण्टामा मात्रै एक हजार आठ जनाले ज्यान गुमाएपछि ज्यान गुमाउनेको संख्या ७१ हजार ६८७ पुगेको छ । त्यस्तै ३२ लाख ४७ हजार २९७ जनाको सफल उपचार भएको छ भने आठ लाख ८३ हजार ५७८ जनाको उपचार भइरहेको छ ।

ब्राजिलमा कोरोना संक्रमितको संख्या ४१ लाख ३७ हजारभन्दा बढी छ । गएको २४ घण्टामा मात्रै १४ हजार ६०६ जना नयाँ संक्रमित थपिएका थिए । अहिलेसम्म ब्राजिलमा एक लाख ३६ हजार ६८६ जनाको ज्यान गएको छ भने ३३ लाख १७ हजारको सफल उपचार भएको छ ।

प्रकाशित समय ०९:५८ बजे