स्थानीय तह सञ्चालनमा आएको डेढ वर्ष पुग्नै लाग्दा समेत कैलालीका स्थानीय तहमा कर्मचारीको अभाव कायमै रहेको छ ।

कर्मचारी व्यवस्थापनमा समस्या आएपछि कैलालीका १३ वटै स्थानीय तहका विकास निर्माणको काम प्रभावित भएका छन् । योजना, कृषि, स्वास्थ्य, शिक्षा, महिला विकास लगायतका शाखामा कर्मचारी अभाव छ । विकास निर्माणका लागि आवश्यक प्राविधिक कर्मचारी समेत नहुँदा स्थानीय तहका विकास योजना अलपत्र अवस्थामा छन् ।

कैलालीको मोहन्याल र चुरे गाँउपालिकामा कर्मचारी अभाव बढी छ । चुरे गाँउपालिकामा २५ अनिवार्य भए पनि १२ जना मात्र कर्मचारी छन् । चुरे गाँउपालिकामा एक जना पनि इन्जिनियर छैनन् । केही सव–इन्जिनियरले मात्र विकास निर्माणका काम गर्दै आएका छन् । १ सय ५० बढी योजना रहेका गाँउपालिकाका वडा सचिव पनि नभएको प्रमुख प्रशासकीय अधिकृत हेमराज जोशीले बताए ।

पहाडी गाउँपालिका मोहन्यालमा पनि वडा सचिव छैनन् । ७ वटा वडा रहेको गाँउपालिकामा ५ वडा सचिव बिहीन छन् । यता, कैलारी गाँउपालिमामा भने शिक्षा शाखामा मात्र कर्मचारीको अभाव छ । गाँउपालिकाका ७ वडामध्ये ५ मा सचिव नरेहेको प्रमुख प्रशासकीय अधिकृत धर्मानन्द भट्टले जानकारी दिए ।

टिकापुर नगरपालिकामा समेत कर्मचारीको अभाव छ । नगरमा स्वीकृत दरबन्दी अनुसारका कर्मचारी छैनन् । सात शाखा र एक आन्तरिक लेखा परिक्षण गरी आठ शाखा नगरपालिकामा छन् । एक शाखाका प्रमुखले अर्काे शाखा हेर्नुपर्ने बाध्यता छ । अधिकृत तहका कर्मचारीको अभाव रहेको छ भने प्राविधिक कर्मचारीको अभाव भएपछि नगरपालिकाले करारमा कर्मचारी भर्ना गरेको छ ।

यस्तै, भजनी नगरपालिकाले समेत कर्मचारी अभाव झेलेको छ । प्राविधिक र शिक्षा शाखामा कर्मचारीको अभाव छ । ६ जना नायव सुब्वा अभाव रहेको नगरपालिकाले जनाएको छ । नगरका ४ सय भन्दाबढी योजना कर्मचारी अभावका कारण कार्यान्वयनमा कठिनाई आएको प्रमुख प्रशासकीय अधिकृत प्रविन पौडेलले बताए ।

धनगढी उप–महानगरपालिकामा समेत कर्मचारीको पदपुर्ति भएको छैन । उप–महानगरको सबैजसो महाशाखा, शाखामा कर्मचारीको अभाव छ । सहकारी, उद्योग, कृषि लगायतका शाखामा कर्मचारीको अभाव बढी देखिएको छ । खेलकुद, सूचना शाखामा समेत कर्मचारीको अभाव छ । उप–मानगरका १९ वडामा ७४ जना कार्यलय सहयोगी समेतको आवश्यकता रहेको सूचना अधिकारी सुरेन्द्र सिंह कार्कीले जानकारी दिए । स्थानीय तहमा कर्मचारीको अभावले सेवा प्रवाहमा समस्या भइरहेको छ भने विकास निर्माणका योजना सञ्चालनमा पनि समस्या छ ।

प्रकाशित समय १०:४८ बजे