काठमाडौं- बैंकहरुले निक्षेपको ब्याजदर बढाउँदा सरकारी स्वामित्वको जलविद्युत लगानी तथा विकास कम्पनी लिमिटेडलाई फाइदा भएको छ । अर्बौं रुपैयाँ बैंकमा निक्षेप राखेको जलविद्युत लगानी तथा विकास कम्पनीलार्इ ब्याजदर बढेपछि ठूलो मात्रामा फाइदा हुने भएको हो ।

सरकारले जलविद्युतमा लगानी गर्न स्थापना गरेको भए पनि कम्पनीले बैंकमा निक्षेप राखेर ब्याज आम्दानी गरिरहेको छ । ब्याजदर बढ्दा चालू आर्थिक वर्षमा कम्पनीले ६२ करोड ५५ लाख रुपैयाँ खुदनाफा गरेको छ । गत आवको सोही अवधिमा कम्पनीले ४१ करोड ६६ लाख रुपैयाँमात्र नाफा गरेको थियो । निक्षेप र कर्जाको ब्याजदर बढेपछि कम्पनीको नाफामा बढेत्तरी भएको हो । बैंकहरुले मुद्धति निक्षेपको ब्याजदर बढाएर १३ प्रतिशतसम्म पुगेको थियो । बैंकले अहिले साधारण वचतमा ८ र मुद्धतिमा ११ प्रतिशतसम्म ब्याज दिँदै आएका छन् । जलविद्युत आयोजनामा गरेको लगानीबाट भने कम्पनीले ७ करोड ९० लाख रुपैयाँ ब्याज आम्दानी गरेको छ ।

प्रकाशित समय १७:०४ बजे