‘लकडाउन खुल्यो’ भन्ने हल्ला चलेपछि महोत्तरीको मटिहानीका सयौं नेपाली भारत प्रवेश गरेका छन् । सामान खरिद गर्न भन्दै भारतको मधवापुर सीमा नाका प्रवेश गरेका उनीहरु अहिले उतै रोकिएका छन् ।

महोत्तरीका मानव अधिकारकर्मी अर्जुन साहका अनुसार मटिहानी र मधवापुरको सीमा नाकामा दुवैतर्फ प्रहरी तैनाथ रहेकै बेला केही समय सीमा खोलिएको बेला एकाएक नेपालीहरु भारततर्फ प्रवेश गरेका हुन् । लगत्तै दुवै तर्फका सुरक्षाकर्मीले सिमानामा कडाई गरेपछि नेपालीहरु भारतीय भूमिमै अलपत्र परेको उनले बताए ।

केही स्थानीयहरुले लकडाउन खुलेको हल्ला गरेपछि एकाएक जम्मा भएका नेपालीहरु भारततर्फ प्रवेश गर्न थालेपछि लाठीचार्ज गर्नुपरेको महोत्तरीका एसपी श्यामकृष्ण अधिकारीले बताए । भारत छिरेकाहरु उतै अलपत्र परेकोबारे भने आफूलाई केही थाहा नभएको एसपी अधिकारीको भनाइ छ ।

‘उता रोकिएकाहरु सीमा क्षेत्रकै नेपाली र २/४ जना मात्र भए फर्काउन सकिन्छ । तर अन्य ठाउँका भए केही गर्न सकिन्न,’ उनले भने । एसपी अधिकारीले घटनाबारे अनुसन्धान भइरहेको जानकारी दिए ।

सीमा नाका भएकाले जति नै कडाई गर्दा पनि हरेक दिन २/४ जना स्थानीयहरु सामान खरिद गर्न भन्दै भारततर्फ जाने-आउने गरेका छन् । कोरोना संक्रमण रोक्न प्रशासनले सीमा नाकामा जनशक्तिसहित सुरक्षा पोष्ट थप गरेको छ ।

प्रकाशित समय २२:१८ बजे