शुक्रबार सरकारसँग ११ बुँदे सहमति गरेर शान्तिपूर्ण राजनीतिमा अवतरण गरेका डा. सिके राउतको समर्थनमा स्वतन्त्र मधेश गठबन्धनले जनकपुरमा र्याली निकालेको छ । मूलधारको राजनीतिमा आउने सहमति गरेर जनकपुर पुगेका राउतको स्वागतमा उनका समर्थकहरुको सहभागीता थियो ।

अखण्ड राष्ट्रको पक्षमा लाग्ने सहमति गरेर जनकपुर पुगेका राउतको स्वागतमा कार्यकर्ताले स्वतन्त्र मधेसको झण्डा प्रयोग गरेका थिए ।

सरकारसँग स्वतन्त्र मधेसको पर्चा, पम्पलेट र झण्डा प्रयोग नगर्ने सहमति गरेको गठबन्धनले जनकपुरमा भने गठबन्धनको झण्डा प्रयोग गरिएपछि राउतको नियतमाथि आशंका गरिएको छ ।

सरकारसँग भएको ११ बुँदे सम्झौताको बुँदा नम्बर ६ मा झण्डासहित पर्चा, पम्पलेट, किताब उत्पादन तथा बितरण नगरिने उल्लेख गरिए पनि राउतलाई विमानस्थलमा स्वागत गर्न गएका कार्यकर्ताहरुले ‘फ्री मधेस’ को झण्डा बोकेका थिए ।

राउतको सुरक्षाका लागि भन्दै स्वतन्त्र मधेश संगठन नाम दिइएको सुरक्षा गार्ड समेत प्रयोग गरिएपछि सरकारसँगको सहमतिलाई जेलबाट निस्कने चालबाजीको रुपमा धेरैले संज्ञा दिएका छन् ।

उनीहरुले टाउकोमा रातो कपडा र स्वतन्त्र मधेस गठबन्धनको झण्डा बाँधिएको, आँखामा चश्मा लगाइएको र मास्कले मुख छोपेका थिए । उनीहरुले सिके राउतसँग प्रतिक्रिया लिन र फोटो खिच्न गएका पत्रकारहरुलाई समेत रोकेका थिए ।

प्रकाशित समय १९:२३ बजे