नेपालका प्रथम किराँती राजा यलम्बरको सम्झनामा किराँती नव–सांस्कृतिक केन्द्रले किराँती समुदायको चाड उभौली (साकेला) का अवसरमा सांस्कृतिक संस्थानमा यलम्बर सांस्कृतिक कार्यक्रम गर्ने भएको छ । कार्यक्रमका अवसरमा विभिन्न विधाका स्रष्टा र साधकलाई सम्मान गर्ने किराँती नव–सांस्कृतिक केन्द्रका संयोजक राकेश किराँतीले जानकारी दिए ।

यलम्बरको नाममा गरिने सम्मानबाट नेपालको पुरानो ऐतिहासिकतालाई पुनर्जागरण गर्न सघाउ पुग्ने तथा किराँत समुदायको चाड साकेलाको पहिचान जोगाउन मद्दत पुग्ने उनले बताए । केन्द्रका सदस्य गायक रुक्मा राईले यलम्बर सांस्कृतिक कार्यक्रममा किराँती वेषभूषा झल्किने सांस्कृतिक कार्यक्रम प्रस्तुत गरिने बताए । ‘यसले आफ्नो मौलिकतालाई जोगाइराख्न मद्दत पुग्छ,’ उनले भने । उक्त कार्यक्रममा शम्भु राई, सत्यकला राई, रुपकुमार राई, सरला राई, कला राई, मनीषा राईलगायत कलाकारले सांस्कृतिक प्रस्तुति रहनेछ ।

प्रकाशित समय १०:५९ बजे