नेपाल विद्युत् प्राधिकरण अत्तरिया ग्रिड कार्यालयअन्तर्गतको लालपुर सबस्टेसनमा जडान भएको पावर ट्रान्स्फर्मरमा ओभरलोड हुन थालेपछि लोडसेडिङको तालिका सार्वजनिक गरिएको छ ।

दुई वर्षअघिदेखि हटेको लोडसेडिङ तालिका पुनः सुरु गरिएको छ । प्राधिकरणको महेन्द्रनगर वितरण केन्द्रका निमित्त कार्यालय प्रमुख पवनकुमार भट्टको हस्ताक्षरित लोडसेडिङ तालिकामा दैनिक ४ देखि ६ घण्टासम्म विद्युत्भार कटौती गरिने जनाइएको छ ।

तालिकाअनुसार बिहान, अपराह्न र राति गरी वाणी, पिपलाडी र झलारी फिडरमा ६ घण्टा, भीमदत्तनगर, बनगाँउ, भाँसी, ऐठपुर, गड्डाचौकी र दोधारा चाँदनी फिडरमा ४ घण्टा लोडसेडिङ हुने जनाइएको छ । अर्को सूचना जारी नहुँदासम्मका लागि लोडसेडिङ तालिका सार्वजनिक गरिएको छ ।

गर्मी बढेको र मनसुनी वर्षा नभएकाले लालपुर १३२ केभी सबस्टेसनमा जडान गरिएको पावर ट्रान्स्फर्मरको क्षमताले नधान्ने अवस्था आएकाले लोडसेडिङ गर्नुपरेको प्राधिकरणका कर्मचारीको भनाइ छ । नेपाल विद्युत् प्राधिकरण अत्तरिया ग्रिडले सबस्टेसनमा रहेको ट्रान्सफर्मरको क्षमता अभिवृद्धि गर्न केही दिन लाग्ने भएकाले बाध्यतावश लोडसेडिङ गर्नुपरेको जनाएको छ । (रासस)

प्रकाशित समय ११:४७ बजे