अविरल वर्षाको कारण देशका विभिन्न स्थानमा आएको बाढी, पहिरो र डुबानमा परी सोमबार दिउँसोसम्म ६७ जनाको मृत्यु भएको छ । बाढी, पहिरो र डुबानमा परी सबैभन्दा धेरै मकवानपुरमा ६ तथा ललितपुर, रौतहट र भोजपुरमा ५/५ जनाले ज्यान गुमाएका छन् ।

त्यस्तै ओखलढुंगा, सिरहा र सिन्धुलीमा ४/४ तथा काठमाडौं, खोटाङ, धनुषा र काभ्रेमा ३/३ जनाको ज्यान गएको छ । झापा, उदयपुर, पर्सा, बारा, महोत्तरी, धादिङ र डोल्पामा २/२ जना तथा इलाम, पाँचथर, मोरङ, सुनसरी, रामेछाप, चितवन, पाल्पा र दाङमा १/१ जना गरी ६७ जनाको मृत्यु भएको हो । मृत्यु हुनेमध्ये २६ जना महिला ४१ जना पुरुष छन् ।

बाढी पहिरोमा परेका काठमाडौंमा २८५, ललितपुरमा ६१, उदयपुर १०, रौतहटमा २ सय, महोत्तरीमा ५ सय, सिरहामा २, सर्लाहीमा १ सय, सप्तरीमा २५, सिन्धुलीमा ७०, धादिङमा १७, चितवन १७० र भक्तपुर, सुनसरी, मकवानपुर, खोटाङ र डोल्पामा १/१ जना गरी जम्मा १ हजार ४४५ जनालाई सकुशल उद्धार गरी सुरक्षित स्थानमा स्थानान्तरण गरिएको छ ।

बाढी पहिरोमा परी डोल्पामा ९ जना, सिन्धुलीमा ४ जना, इलाम र मोरङमा ३/३ जना, महोत्तरी र मकवानपुरमा २/२ जना तथा काठमाडौं, ललितपुर, झापा, सुनसरी, पर्सा, रौतहट, धनुषा, धादिङ र दाङमा १/१ जना गरी ३२ जना बेपत्ता भएका छन् । बेपत्ता भएकामध्ये १४ महिला र १८ जना पुरुष छन् । बेपत्ताको खोजी कार्य जारी रहेको प्रहरीले जनाएको छ ।

धनकुटामा ८, मकवानपुरमा ५, ललितपुर र सिरहामा ३/३, झापा, भोजपुर, सुनसरी, महोत्तरी, काभ्रे र सिन्धुलीमा २/२ तथा काठमाडौं, भक्तपुर, खोटाङ, उदयपुर, रामेछाप, धादिङ, दोलखा र चितवन १/१ जना गरी ३९ जना घाइते भएका छन् । घाइतेमध्ये १८ महिला र २१ पुरुष छन् । घाइतेलाई उपचारको लागि स्थानीय अस्पताल लगिएको छ ।

पहिरो तथा बाढीको कारण बन्द भएका विभिन्न स्थानका बाटो प्रहरीले सञ्चालनमा ल्याएको छ । साथै महोत्तरीको बर्दिवास नगरपालिका-१ र ४ जोड्ने पूर्व–पश्चिम राजमार्गमा रहेको भप्सी खोलामा डाइभर्सन गरेको बाटो पानीको बहाव बढ्न गई सोमबार बिहानबाट अवरोध भएको छ । ललितपुर, मकवानपुर, रामेछाप, मुस्ताङ, मनाङ, ओखलढुङगा, भोजपुर, रौतहट, महोत्तरी, पाल्पा, कालिकोटलगायतका स्थानमा भएको बाटो अवरोध हटाउने कार्य जारी रहेको प्रहरीले जनाएको छ ।

बाढी पहिरोका कारण १६ हजार ५०२ घरधुरी प्रभावित भएको राष्ट्रिय आपतकालीन कार्यसञ्चालन केन्द्रले जनाएको छ ।

यसैबीच, स्थानीय तहमा कार्यरत प्रशासकीय अधिकृतहरूलाई आफू कार्यरत पालिका नछाड्न निर्देशन जारी गरिएको छ । संघीय मामिला तथा सामान्य प्रशासन मन्त्रालयले सबै तहलाई परिपत्र गरी विपतका समयमा आफू कार्यरत पालिका नछाड्न निर्देशन दिएको हो ।

प्रकाशित समय १५:०४ बजे