भूकम्पबाट क्षतिग्रस्त आवास निर्माणका लागि अनुदान निकासीका क्रममा भूकम्पपीडितसँग घूस लिएको अभियोगमा एक सव इन्जिनियरविरुद्ध विशेष अदालतमा मुद्दा दायर भएको छ ।

अख्तियार दुरुपयोग अनुसन्धान आयोगले बनेपा नगरपालिकामा कार्यरत सव इञ्जिनीयर आकाश श्रेष्ठ विरुद्ध मुद्दा दायर गरेको हो । श्रेष्ठ स्थलगल निरीक्षण गरी प्रतिवेदन तयार गर्ने क्रममा भूकम्पपीडितसँग घुसबापत २५ हजार लिएको अवस्थामा पक्राउ परेको आयोजले जनाएको छ ।

यस्तै अख्तियारको टोलीले अदालतमा विचाराधीन मुद्दा मिलाइदिने भन्दै सेवाग्राहीसँग घूस लिने जिल्ला अदालत सिरहाका सवारी चालक वृजमोहन यादवलाई घूससहित नियन्त्रणमा लिएको छ । उनले मुद्दा मिलाइदिने भन्दै एक लाख १० हजार घूस लिएको अख्तियारले जनाएको छ ।

यादवलाई सिरहा नगरपालिका-७ हस्पिटल चोकस्थित खड्ग होटलबाट नियन्त्रणमा लिइएका आयोगका प्रवक्ता प्रदीपकुमार कोइरालाले जानकारी दिए ।

प्रकाशित समय ०६:५७ बजे