विराटनगरस्थित बालसुधार गृहको झ्याल फुटाइ हामफालेर पाँच दिनअघि भागेका दुई बालक पक्राउ परेका छन् । एक जनालाई मोरङको गोठगाउँबाट शुक्रबार राति र अर्कोलाई झापाको बिर्तामोडबाट शनिबार बिहान पक्राउ गरिएको मोरङका एसपी विश्व अधिकारीले जानकारी दिए ।

दुवै जनालाई पक्राउ गर्नका लागि प्रदेश १ प्रहरीले विशेष टोली परिचालन गरेको थियो अदालतको आदेशबाट पुर्पक्षका लागि थुनामा रहेका दुवै बालक बालसुधार गृहको तेस्रो तलाको झ्याल फुटाएर गत सोमबार बिहान फरार भएका थिए । २४ घण्टा नै प्रहरीको सुरक्षा हुने सुधार गृहको तेस्रो तलाको झ्यालको ग्रील निकाल्दै पछाडिबाट हामफालेर उनीहरु फरार भएको एसपी अधिकारीले बताए ।

एसपी अधिकारीका अनुसार उनीहरुलाई आफ्नै गाउँमा पुगेर लुकिछिपी बसेको अवस्थामा पक्राउ गरिएको हो । मोरङको सुन्दरहरैंचा नगरपालिका– ७ का १७ वर्षीय बालकलाई जबर्जस्ती करणी मुद्दामा मोरङ जिल्ला अदालतले गत असारमा पुर्पक्षका लागि थुनामा पठाएको थियो । ज्यान मार्ने उद्योग मुद्दामा झापाको गौरादह नगरपालिका– १ का १६ वर्षीय अर्का बालक पनि साउनदेखि थुनामा थिए ।

बालक फरार भएपछि मोरङ प्रहरीका प्रवक्ता डीएसपी राजकुमार खिँउजुको नेत्रृत्वमा छानबिन समिति बनाइएको थियो । दुवै पक्राउ परेकाले भाग्नुको कारणबारे सबै वास्तविकता बाहिर ल्याउने गरी छानबिन गरिने डीएसपी खिउँजुले बताए । थुनामा रहेको अवस्थामा सुधार गृहबाट भागेकाले दुवैलाई कानुनबमोजिम थप कारबाही अघि बढाएर बालसुधार गृहकै जिम्मा लगाइने उनले जानकारी दिए ।

घटनामा संलग्न तथा कमजोरी रहेको पाइएमा ड्युटीमा रहेका प्रहरीमाथि पनि कारबाही गरिने प्रदेश प्रहरीले जनाएको छ । बालकहरु फरार भएका बेला सुधार गृहको सुरक्षाका लागि असई टीका राईको नेत्रृत्वमा प्रहरी टोली ड्युटीमा थिए ।

प्रकाशित समय १९:१५ बजे