बैतडीका ३ मजदूरले बुवा बितेको ४ दिनसम्म पनि नेपाल प्रवेश गर्न पाएका छैनन् । देशभर लकडाउन घोषणा भएसँगै सीमा नाका सिल भएपछि स्वदेश फर्किएका उनीहरु भारतीय क्वारेन्टिनमै बसेका छन् ।

बैतडीको पुर्चौडी नगरपालिकाका प्रेम धामी, अम्मर सिंह धामी र राम धामीको बुवाको गत आइतबार निधन भएको थियो । पाँच दाजुभाइमध्ये उनीहरु तीन जना अहिले भारतको पिथौरागढ जिल्लाअन्तर्गत धार्चुलाको क्वारेन्टाइनमै किरियामा बसेका छन् ।

घरमै गएर बुवाको किरिया बस्ने धोको भए पनि आफूहरुको जान नपाएको अमर सिंह धामीले बताए । ‘बिसु पर्वका लागि घर आएका हौं तर बुवासँग भेट हुन पाएन,’ उनले भने, ‘७ गते बुवाले संसार छोड्नु भएछ ।’

बुवालाई दागबत्ती दिन नपाउँदा साह्रै खल्लो लागेको उनले सुनाए । घरमा बुवा बिरामी भएको थाहा पाएपछि जान दिन आग्रह गर्दा पनि कसैले आफूहरुको कुरा नसुनेको उनले बताए । अर्का छोरा प्रेमसिहं धामीले बिरामी बुवालाई भेट्न नपाए पनि कमसेकम घरमै पुगेर किरिया बस्न दिन आग्रह गरेका छन् ।

जिल्ला प्रशासन कार्यालय बैतडीले भने भारतीय क्वारेन्टिनमा बसेका ती मजदूरलाई नेपाल ल्याउन पहल भइरहेको जनाएको छ । आइतबार बुवाको मृत्यु भएपछि उनीहरुलाई बुधवार नेपाल भित्राइने तयारी भएको बैतडीका प्रमुख जिल्ला अधिकारी आनन्द पौडेलले बताए । घरमा बुवा बितेपछि उनीहरुलाई नेपाल भित्र्याउन भारतीय प्रशासनसँग समन्वय भइरहेको उनले जानकारी दिए ।

उनीहरु तीनै जना पिथौरागढको गभर्मेन्ट इन्टरमेडियट कलेजमा क्वारेन्टिनमा किरियामा बसिरहेका छन् । यसअघि दार्चुलाको शैल्यशिखर नगरपालिकाका वाशुदेव भट्ट पनि आमाको निधन भएपछि ६ दिनसम्म भारतीय क्वारेन्टिनमै बसैका थिए । भारतीय केन्द्र सरकार र नेपाल सरकारको अनुमतिपछि मात्र उनीहरूले नेपाल प्रवेश गर्न पाएका थिए ।

प्रकाशित समय १९:१० बजे