विदेशबाट आई गाउँघरमा लुकेर बसेका तथा काठमाडौँबाट गाउँ फर्काइएकालाई राखिएपछि यहाँका क्वारेन्टिन खचाखच भरिएका छन् । चैत लागेयता पाँचथरका १२९ जना विदेशबाट फर्केका थिए । तीमध्ये झण्डै एक तिहाइ मानिस क्वारेन्टिनमा नबसी गाउँघरमै लुकेर बसेका थिए ।

पहिलो चरणमा विदेशबाट फर्केका तथा उनीहरुको सम्पर्कमा पुगेका १०४ जनालाई क्वारेन्टिनमा दुई साता राखेर शीघ्र डाइग्नोष्टिक टेष्ट (आरडिटी) परीक्षणपछि घर फर्काइएको थियो ।

पछिल्लो पटक प्रशासनले विदेशबाट फर्केर लुकीछिपी बसेकाको सम्पर्कमा पुगेका, रातारात अन्य जिल्लाबाट आएका तथा काठमाडौँबाट ल्याइएकालाई क्वारेन्टिनमा राखेको छ । हाल यहाँका क्वारेन्टिनमा ५२५ जना रहेका छन् । यही साता काठमाडौँबाट २९२ जना जिल्लामा आइपुगेका थिए । उनीहरु सबैलाई शीघ्र परीक्षणपछि मात्रै घर फर्काउने प्रशासनको निर्णयपछि क्वारेन्टिन खचाखच भरिएका हुन् । क्वारेन्टिनमा नौजना बालबालिकासमेत रहेका छन् ।

एकैसाथ झण्डै ३०० जनालाई क्वारेन्टिनमा राख्न परेपछि यहाँका स्थानीय तहले सरकारी कार्यालय, विद्यालय तथा स्वास्थ्य संस्थाका भवनमा अस्थायी क्वारेन्टिन निर्माण गरेका छन् । यस क्रममा क्वारेन्टिनमा बस्नेले समस्यासमेत भोग्नुपरेको छ । स्थानीय तहलाई व्यवस्थापनमा समस्या आएको छ । निकै असहज हुनेगरी एकै कोठामा धेरै शय्या राखेर अस्थायी क्वारेन्टिन निर्माण गरिएका छन् । सदरमुकाम फिदिमकै क्वारेन्टिन निकै साँघुरा र संक्रमणको जोखिमका दृष्टिले चुनौतीपूर्ण छन् ।

क्वारेन्टिनमा सामग्रीको समेत अभाव छ । फाल्गुनन्द गाउँपालिका–३ स्थित जलसिंह माध्यमिक विद्यालयमा निर्माण गरिएको क्वारेन्टिनमा फाल्गुनन्द र फिदिम नगरपालिकाका १२३ जनालाई राखिएको छ । चिसो ठाउँ भएका कारण क्वारेन्टिनमा बस्नेलाई न्यानो कपडासमेत उपलब्ध गराउन नसकिएको फाल्गुनन्द गाउँपालिकाका प्रमुख प्रशासकीय अधिकृत अनिल तित्रखीको भनाइ छ । ‘रेडक्रसबाट प्राप्त भएका तथा खरिद गर्न भेटेसम्म कम्बल खरिद गर्‍याैं,’ उनले भने, ‘चिसो ठाउँ भएकाले क्वारेन्टिनमा बस्नेहरुलाई समस्या छ ।’ उनीहरुलाई खाने र बस्नेको उचित प्रबन्ध गर्न कठिनाइ परेको तिखत्रीले बताए ।

जिल्लाबाहिर रहेका मानिस जिल्ला भित्रिने क्रम निरन्तर रहे संक्रमणको जोखिम बढ्ने भएकाले यथास्थानमा राख्न आग्रह गरिँदै आएको प्रमुख जिल्ला अधिकारी अर्जुनकुमार शर्माले बताए । ‘संक्रमण फैलिएका जिल्लाबाट समेत पाँचथर आउन पाउनु पर्‍यो भन्ने माग आएका छन्,’ उनले भने, ‘अब कसैलाई पनि जिल्ला नपठाउन प्रदेश सरकारलाई लिखित आग्रह गरेका छौँ ।’

विगतमा छिमेकी जिल्ला झापाबाट आएकाहरुलाई समेत क्वारेन्टिनमा राखिएको थियो । तर अहिले काठमाडौँबाट आउनेलाई समेत क्वारेन्टिनमा राख्न नसक्ने स्थिति आउनु चिन्ताको विषय भएको प्रजिअ शर्माको भनाइ छ । गाउँ सुरक्षित छ भन्ने भ्रममा अन्य जिल्ला तथा ठूला शहरमा लामो समय रहन सक्ने सक्षम आर्थिक अवस्थाका मानिससमेत गाउँ फर्कन थालेपछि स्थानीयस्तरमा समस्या आएको हो ।

क्वारेन्टिनमा राखिएका व्यक्तिको बुधबारदेखि शीघ्र डाइग्नोष्टिक परीक्षण गरिने भएको छ । जिल्ला समन्वय समितिका प्रमुख विष्णुप्रसाद सापकोटाका अनुसार उक्त परीक्षणका लागि जिल्लामा मंगलबार मात्रै ९ सय थान किट प्राप्त भएका छन् । बुधबारदेखि शीघ्र डाइग्नोष्टिक परीक्षण गरी घर फर्काउन थालिने सापकोटाले जानकारी दिए । हालसम्म पाँचथरमा २०६ जनाको शीघ्र परीक्षण गरिएको छ भने ३७ जनाको स्वाब परीक्षण गरिएको स्वास्थ्य कार्यालय पाँचथरका प्रमुख नारदमुनि सुवेदीले बताए । हालसम्मका परीक्षणमा कसैको पनि नतिजा पोजेटिभ आएको छैन । संक्रमणको जोखिम अझै पनि उत्तिकै रहेकाले अझै पनि सतर्कतामा कमी हुन नदिइने प्रजिअ शर्माको भनाइ छ । (रासस)

प्रकाशित समय १७:५६ बजे