भारतका विभिन्न  ठाउँबाट फर्किएर नेपाल‑भारत सीमा क्षेत्रमा अलपत्र परेका गण्डकी प्रदेशका साढे १३ सयभन्दा बढीको उद्धार गरिएको छ । नोबेल कोरोनाभाइरस (कोभिड १९)का कारण भारतमा लकडाउन भएपछि सीमा क्षेत्रमा आइपुगेर अलपत्र परेका उनीहरूको उद्धार गरिएको हो ।

प्रदेश भित्रिने मुख्य तीन नाकाबाट १ हजार ३७१ जनाको उद्धार गरिएको प्रदेश प्रहरी कार्यालय गण्डकीका सूचना अधिकारी एसएसपी किरण रानाले जानकारी दिइन् । प्रहरीको तथ्यांकअनुसार सबैभन्दा धेरै नवलपुरका ३३५ जना घर फर्किएका छन् । त्यस्तै बागलुङका ३३१, तनहुँका २४०, स्याङ्जाका १९०, म्याग्दीका १२२, लमजुङका ४५, पर्वतका ३९, कास्कीका ३८, गोरखाका ३० र मनाङका एक जना घर फर्किएका छन् ।

हालसम्म १० हजारको कोरोना परीक्षण

गण्डकी प्रदेशमा हालसम्म साढे ९ हजारभन्दा बढीको कोरोना परीक्षण गरिएको छ । पिसिआर र आरडिटी दुवै विधिबाट गरेर ९ हजार ७१६ जनाको कोरोना परीक्षण गरिएको स्वास्थ्य निर्देशनालय गण्डकीले जनाएको छ ।

त्यसमध्ये दुई हजार १५ जनाको पिसिआर विधिबाट कोरोना परीक्षण गरिएको छ । अहिलेसम्म २ हजार ४४ जनाको स्वाब संकलन गरिए पनि  २९ जनाको रिपोर्ट आउन बाँकी छ । स्वास्थ्य निर्देशनालयका अनुसार गण्डकी प्रदेशमा ७ हजार ७०१ जनाको आरडिटीमार्फत कोरोना परीक्षण गरिएको छ ।

प्रकाशित समय ०८:४५ बजे