नोवेल कोरोनाभाइरस (कोभिड १९) को रोकथाम तथा नियन्त्रणका लागि सरकारले लकडाउन गरेदेखि नै कुकुर, चराचुरूंगी र भोका मानिसहरूलाई खाना खुवाउँदै हिँडेको नेपाल स्वयंसेवक संघले शनिबार पनि काठमाडौंको वालाजु क्षेत्रका सय जनाभन्दा बढीलाई खाना खुवाएको छ । संघको अग्रसरतामा वालाजु संरक्षण समितिका अध्यक्ष साञ्जे गुरुङ, सल्लाहकार आरबी ठकुरी, नेपाल स्वयंसेवक संघका उपाध्यक्ष, हरि ठकुरी, जागृति युवा क्लबका अध्यक्ष सन्तोष गुरुङलगायसको समूहले असहाय  तथा विपन्नलाई खाना खुवाएको हो ।

संघका अन्य स्वयंसेवक सहितको टोलीले वालाजु र सोह्र खुट्टेको बीचमा विष्णुपति पुलनजिकै रहेको विष्णुमति महादेव मन्दिर सरसफाइ पनि गरेको संघका अध्यक्ष सन्तोष निरौलाले जानकारी दिए । उनका अनुसार सय जनाभन्दा बढीलाई खाना र पानी वितरण गरिएको छ ।

संघको अग्रसरतामा लकडाउनयता एक लाखभन्दा धेरै मानिसलाई खाना खुवाइएको थियो । त्यस्तै पशुपतिनाथ र भक्तपुर क्षेत्रका धेरै मन्दिरका चराचुरुंगी र सडकमा भेटिएका कुकुरलाई पनि उनीहरूले आहारा तथा दाना दिएका थिए ।

यसअघि संघले उपत्यकाका सरकारी अस्पतालमा १७ सय केस पानी वितरण गरेको थियो । संघले उपत्यकाका तीनवटै जिल्ला काठमाडौँ, भक्तपुर र ललितपुरका सबै सरकारी अस्पतालका प्रत्येक शय्याका बिरामीलाई तीन दिन लगाएर पानी वितरण गरेको हो ।

संघका अध्यक्ष निरौलाका अनुसार वीर अस्पताल र ट्रमा सेन्टरमा पाँच सय केस, भक्तपुरका मानव अंक प्रत्यारोपण केन्द्र, भक्तपुर अस्पताल र भक्तपुर क्यान्सर अस्पतालमा तीन सय केस, त्रिवि शिक्षण अस्पतालमा ६ सय केस, मनमोहन कार्डियोथोरासिक भास्कुलर एन्ड ट्रान्सप्लान्ट सेन्टरमा एक सय केस र ललितपुरको पाटन अस्पतालमा २५० केस पानी वितरण गरिएको थियो ।

प्रकाशित समय १२:५२ बजे