गृहपृष्ठ सिरहामा आलु बीउको अभाव

सिरहामा आलु बीउको अभाव

कोरोना संक्रमणका कारण मुलुक बाहिरबाट थोरै मात्रामा आलुको आयात भएपछि सिरहामा आलु बिउको अभाव भएको छ । आलुको बढी आयात हुने भारतको पश्चिम बंगलाबाट यस वर्ष कोरोना संक्रमण र बन्दाबन्दीका कारण थोरै मात्रामा आलु आयात भएपछि बिउको अभाव भएको व्यापारीहरुले बताएका छन् । आलुको अभाव भएसँगै बजारमा बिउको मूल्यसमेत अकासिँदा किसानहरु मारमा परेका छन् ।

आलु खेती लगाउने समयमा आलु बिउमा व्यापारीहरुले अचानक मनपरी मूल्य वृद्धि गरेका कारण समस्यामा परेको किसानहरुले गुनासो गरेका छन् । गत वर्ष ५० किलो (एक बोरा) को एक हजार रुपैयाँ पर्ने आलु बिउको मूल्य यस वर्ष अहिले तीन हजार रुपैयाँमा बिक्री भइरहेको किसानहरुले बताएका छन् ।

आलु रोप्नका लागि खेत तयार पारेर बिउका लागि लहान बजार आइपुग्नुभएका तरेगनाका किसान शत्रुघन चौधरीले अचानक बिउको मूल्य बढेकाले समस्यामा परेको गुनासो गरे । ‘अघिल्लो वर्ष एक हजार रूपैयाँमा एक बोरा बिउ खरिद गरेको थिएँ, यस वर्ष पनि त्यहीअनुसार मूल्य होला भन्ने सोचेर बिउ खरिद गर्न आएँ तर मूल्य बढेपछि बिउ खरिद नै नगरी रितो फर्किनु परेको छ ।’ अचानक बजारमा आलु बिउको मूल्य बढे पनि बजार अनुगमन नभएकाले व्यापारीहरुको मनपरी बढेको चौधरीको कथन छ ।

‘एकातिर आलुको मूल्य बढेको छ भने अर्काेतिर बोरामा पनि कम तौल रहने गरेको छ,’ सिरहाको सीतापुरका सुभाष साहले भने,’बोरामा ५० किलो रहेको बताए पनि घरमा लगेर जोख्दा कुनै बोरामा ४६, ४७ र ४८ किलो मात्र आलु पाइएको छ ।’ बोरामा आलु कम पाइए पनि त्यस्ता व्यापारीमाथि कुनै कारबाही नभएको उनको गुनासो छ ।

सिरहाका बजारहरुमा अहिले बंगाली, सेतो र रातो आलुको बिउ बिक्री भइरहेको छ । यस वर्ष बंगाली आलु दुई हजार ९०० रूपैयाँ, सेतो आलु तीन हजार १०० रूपैयाँ र रातो आलु बीउ तीन हजार १०० रूपैयाँमा विक्री भइरहेको छ । बन्दाबन्दीका कारण भारतको पश्चिम बंगलाबाट थोरै मात्रामा आलु आएको र त्यहाँबाट महँगो खरिद गरेर ल्याउनुपरेकाले महँगोमै बिक्री गर्नुपरेको व्यापारीहरुले बताएका छन् ।

प्रकाशित समय ०९:१९ बजे

प्रतिक्रिया दिनुहोस्

सम्बन्धित शीर्षकहरु