बागमती सफाइ महाअभियानको ४००औं हप्ताको कार्यक्रम कोरोना महामारीका कारण साना–साना समूहमा गरिने भएको छ । महाअभियानका मुख्य अभियानकर्मी एवं सरकारका पूर्व मुख्यसचिव, पूर्वराजदूत लीलामणि पौड्यालले समितिको सहकार्यमा ४००औं हप्ताको कार्यक्रम विशेष बनाउन आग्रह गरे ।

विषम परिस्थितिले ठूलो समूहमा सरसफाइ कार्यक्रम हुन नसके पनि वाग्मती सफाइ अभियानलाई निरन्तरता दिँदै समूह नेता बनाई परिचालन गर्ने गरी त्यसको समन्वयका लागि काठमाडौं महानगरपालिकाले समेत नेतृत्व लिनुपर्ने उनले बताए । कार्यक्रममा अधिकारसम्पन्न बागमती सभ्यता एकीकृत विकास समितिका आयोजना प्रमुख नवराज प्याकुरेलले बागमतीमा हालसम्मको प्रगति, विद्यमान चुनौतीको अवस्थालगायतका विषयमा प्रस्तुतीकरण गरे । प्याकुरेलले सरोकार भएका निकायका बीच समन्वयात्मक ढंगबाट अगाडि बढ्ने बताए ।

समितिका कार्यकारी अध्यक्ष उद्धवप्रसाद तिमल्सेनाले बागमती शुद्धीकरणमा सबैको सहयोगको आशा राख्दै हालका समस्या समाधान गर्न लागिएको जानकारी दिए । अव्यवस्थित बसोबासलाई नियन्त्रण गर्ने, बागमतीको ढल व्यवस्थापन चोभारसम्म पुर्‍याउने र मुआब्जा दिने कुरामा आफू कटिबद्ध भएर लाग्ने भन्दै उनले त्यसमा सबैको साथ र सहयोगको आवश्यकता हुनुपर्ने बताए ।

सरसफाइको सबै जिम्मा समितिले लिन तयार रहेको तथा कमीकमजोरी र सुझावलाई स्वीकार्दै त्यसको समाधानको बाटोतिर अघि बढ्ने अध्यक्ष तिमल्सेनाको भनाइ थियो । बैठकमा बागमती सफाइ महाअभियानमा सुरुदेखि लागिरहेका अभियानकर्मी, काठमाडौं महानगरपालिका, नेपाल प्रहरी, सशस्त्र प्रहरी, बागमती सुन्दरता सरोकार मञ्च, तिलगङ्गा महिला समूह, रुद्रमती सफाइ अभियान, विष्णुमती सफाइ अभियान, आलोकनगर सफाइ अभियान, चक्रपथ सफाइ, बल्खुखोला सफाइ अभियान, मनोहरा सफाइ, गोदावरी सफाइ अभियानका अभियानकर्मीले विचार, समस्या एवं वाग्मती नदी र अन्य सहायक नदीको संरक्षण एवं सुधारका सम्बन्धमा सुझाव दिएका थिए ।

विसं २०७० जेठ ५ गतेदेखि सुरु भएको बागमती सफाइ महाअभियानले आगामी पुस २५ गते शनिबार ४००औं हप्ता पूरा गर्दैछ । बागमती नदी सरसफाइको प्रेरणाले सफाइ अभियान देशका १०६ भन्दा बढी ठाउँमा एकै समयमा सञ्चालन भइरहेको छ । (रासस)

प्रकाशित समय ०९:५३ बजे