ग्लोकल प्राइभेट लिमिटेडद्वारा आयोजित ‘लोकल टीन हिरो २०२०’ को उपाधि रामेछापकी मन्दिरा श्रेष्ठले जित्न सफल भएकी छन् । किशोरकिशोरीहरुमा भएको प्रेरणा र उत्साहलाई प्रष्फुटन गरी उनीहरुले समाजमा गरेको प्रभावकारी कार्यलाई कदर र अरुमाझ चिनाउने कार्यक्रम ‘वाई वाई ग्लोकल टीन हिरो’ नेपालको यो छैठौं संस्करण हो । देशभरीका किशोरकिशोरीहरुबाट कुल ६०४ आवेदन आएकोमा शनिबार ग्लोकल टीन हिरो उपाधिबाट सम्मानित गरिएको हो ।

शनिबार भएको अनलाइन कार्यक्रमको बीच ग्लोकल टीन हिरो नेपाल, २०२० को घोषणा गरिएको हो । भर्चुअल कार्यक्रममा श्रम, रोजगार र सामाजिक सुरक्षा मन्त्रालयका रामेश्वर राय यादवले विजेताको घोषणा गरेका थिए । शिक्षा, उद्यमशीलता, कुटनीति एवं अन्य विविध क्षेत्रका व्यक्तित्वहरुको उपस्थितिमा यो कार्यक्रम सञ्चालन गरिएको थियो । वाई वाई ग्लोकल टीन हिरोका अन्तिम ६ प्रतिस्पर्धीहरु एकराज घिमिरे वातावरण विद्, मन्दिरा श्रेष्ठ स्वास्थ्य अभियन्ता, रीता काफ्ले शिक्षिका, सुभाश शर्मा कोडर, सुलव सुवेदी नवप्रवद्र्धक र वैभव नाहटा उद्द्यमीबीच प्रतियोगिताको विजेता चयन गरिएको थियो ।

मन्दिरा श्रेष्ठ रामेछापकी १९ वर्षीया स्वास्थ्य कार्यकर्ता एवं अभियन्ता हुन् । उनले ‘युपीआरमा बाल नेतृत्वको रिपोर्ट, २०२०’ को टीम लिडरको रूपमा काम गरेकी छन् । उनी एकीकृत राष्ट्रिय किशोरकिशोरी फोरमको सदस्यको रूपमा पनि सक्रिय रुपमा सहभागी भइरहेकी छन् । त्यस्तै शिक्षामा महिलाको पहुँचका लागि काम गर्दै उनी ‘ट्री पद्ममा चाइल्ड क्लबमा’ सामाजिक स्वयंमसेवकको रुपमा काम गरिरहेकी छन् । स्वास्थ्य क्षेत्रमा कामको अनुभव बटुल्दै उनी एसआरएचआर क्षेत्रमा प्रशिक्षकको रुपमा पनि अग्रसर छिन् ।

प्रकाशित समय १७:०६ बजे