महानगरीय ट्राफिक प्रहरी महाशाखाको पीडित सहायता ईकाइबाट सादा पोसाकमा खटिएको ट्राफिक प्रहरी टोलीले  मोटरसाइकल चोरी गर्ने दुई जनालाई पक्राउ गरेको छ । आइतबार जिल्ला भक्तपुर चाँगुनारायण नगरपालिका वडा नं. ४ बस्नेवर्ष २६ को छेसाङ्ग लामा र वर्ष २३ को शिल बहादुर तामाङलाई चोरी गरेको बा ९९ प ७७३१ नम्बरको सेतो रंगको केटीएम डुक मोटरसाइकलसहित पक्राउ गरेको महानगरीय ट्राफिक प्रहरी महाशाखाका प्रमुख एसएसपी जनक भट्टराईले जानकारी दिए ।

त्रिपुरेश्वरस्थित अटो क्लिनिक मोटरसाइकल वर्कशपमा बनाई रहेको उक्त मोटरसाइकललाई शंकास्पद लागि अनुसन्धान गर्दा चोरी भएको खुल्न आएको हो । उक्त मोटरसाइकलको वास्तविक नं.  प्रदेश ३-०२-००६ प २४९५ रहेको खुल्न आएको छ । काठमाडौं अत्तरखेलबाट हराएको भनि जिल्ला खोटाङ ऐसेलुखर्क वडा नं. ६ बस्ने सोम कुमार राईले हुलिया सहितको निवेदन यस महाशाखामा दिएका थिए । दुवैजनालाई मोटरसाइकलसहित आवश्यक कारवाहीको लागि महानगरीय प्रहरी वृत्त, बौद्ध पठाइएको छ ।

प्रकाशित समय १२:०२ बजे