प्रधानमन्त्री केपी शर्मा ओलीले नेपालको राष्ट्रियतामाथि प्रहार गर्न अभियान नै चलाइरहेको भारतीय च्यानल जी न्युज टिमलाई बोलाएर अन्तर्वार्ता दिएका छन् । भारतमा थुप्रै प्रतिष्ठित र इज्जतिला सञ्चारमाध्यम भए पनि कालापानी, लिपुलेक र लिम्पियाधुराका विषयमा अनेकन् नकारात्मक टिप्पणी गर्दै नेपालको उछितो काढिरहेको च्यानललाई बोलाएर प्रधानमन्त्रीले अन्तर्वार्ता दिएका हुन् ।

अन्तर्वार्ताका क्रममा भारत र नेपालबीचका विवादित विषयका साथै चीनसँगको नेपालको सम्बन्धका विषयमा सन्तुलित ढंगले प्रस्तुत भएका प्रधानमन्त्रीले जी न्युजलाई बोलाउनु नै गलत भएको टिप्पणी सर्वत्र भइरहेको छ । नेपालको राष्ट्रियता खण्डित पार्ने काम गर्दै आएको जी न्युज टिमलाई प्रधानमन्त्रीले सगरमाथानजिकैको कालापत्थरसम्म पुग्न दिएर नेपाल र नेपालीको स्वाभिमानमा आँच पुग्ने अर्को कृत्यका लागि अवसर दिएका छन् ।

विगतमा बन्द स्टुडियोबाट सगरमाथामाथि धावा बोलिरहेका जी न्युजका सम्पादक सुधीर चौधरीले यसपटक कालापत्थरबाटै माउन्ट एभरेस्टको नाम माउन्ट सिकदर हुनुपर्ने र त्यसका लागि अभियान नै सञ्चालन गर्ने बताए । ‘तपाईं पनि माउन्ट एभरेस्टलाई माउन्ट सिकदर भन्ने हाम्रो अभियानमा सहभागी हुनुस् । यो अभियान आजबाट हामी सुरु गर्दै छौँ । हामी यो माग उठाइरहेका छौँ, माउन्ट एभरेस्टको नाम माउन्ट सिकदर हुनुपर्छ । अब भारतले पनि माउन्ट एभरेस्टमाथि आफ्नो दाबी सारा विश्वका अगाडि राख्नुपर्छ,’ उनले कालापत्थरबाट भने ।

तर, बालुवाटारमा बोलाएर न्यायो आथित्य प्रदान गरेको ओली सरकारले अहिलेसम्म पनि चौधरीको उक्त हर्कतको खण्डन गरेको छैन । यसले केपी ओलीको राष्ट्रियतामात्र होइन, भारतसँगको सम्बन्धमाथि पनि संशय पैदा गरेको छ ।

पार्टीभित्रको विवादका कारण सरकारबाट हट्नुपर्ने स्थिति आएपछि पुस ५ गते हठात् गैरसंवैधानिक ढंगले संसद विघटन गरेर चुनाव घोषणा गरेका ओली देशभरबाट आलोचित बनेपछि भारतको निम्नस्तरको मिडिया शरणमा पुगेको अधिकांशको टिप्पणी छ । नेपालका मिडियादेखि उनकै दल नेपाल कम्युनिस्ट पार्टी नेकपा, नेपाली कांग्रेस, जनता समाजवादी पार्टी, नागरिक समाज, बुद्धिजीवी र आम नागरिकसमेत ‘संवैधानिक कु’को विरुद्धमा उभिएपछि ओलीले भारतीय मिडियाको सहयोग खोजेका हुन् तर उनको रोजाइमा त्यहाँको गतिलो मिडिया पर्न सकेन, बरु पटक‑पटक नेपालको राष्ट्रियतामाथि प्रहार गर्ने र नेपालीमाथि अनेक लाञ्छना लगाउने च्यानल पर्‍यो ।

त्यति मात्र होइन, ओली सरकारले महिनौँदेखि सगरमाथामाथि हक जताउने गरी अभियान नै छेडिरहेको च्यानललाई नेपाली भूमिमै, त्यो पनि सर्वोच्च शिखरलाई पृष्ठभूमिमा पारेर दाबी गर्ने अवसर दिएको छ । यसले नेपाली राष्ट्रियता कमजोरमात्र पारेको छैन, नेपाली स्वाभिमानमा समेत आँच पुग्ने काम भएको छ ।

प्रकाशित समय ०७:४८ बजे