बारेकोट गाउँपालिकाको नायकबाडा सिँचाइ योजनाको निर्माण कार्य पञ्चायतकालमै सुरु भए पनि अहिलेसम्म निर्माण हुन सकेको छैन । संघीय लोकतान्त्रिक गणतन्त्र शासन व्यवस्था आउँदा पनि नायकबाडा सिँचाइ योजनाको निर्माण कार्य पूरा नभएपछि खाद्य अभावको समस्या झेल्दै आएका बारेकोटवासीको आफैं अन्न फलाउने सपना अधुरै छ ।

उक्त सिँचाइ योजना पूरा नभएपछि नेपाल खाद्य संस्थानको नायकबाडाघाट खाद्य डिपोका भरमा बारेकोटवासीले जीवन निर्वाह गर्नुपरेको छ । पञ्चायतकालमा निर्माण कार्य सुरु गरेको उक्त योजना हालसम्म पूरा हुन सकेको छैन । बजेट अभाव र निर्माण कार्यको जिम्मा लिएका निर्माण कम्पनीको लापरबाहीले उक्त योजना अलपत्र परेको हो ।

तत्कालीन नायकबाडा पञ्चायत वडा नं १, ३, ६ र ७ को खेतीयोग्य जमिनमा सिँचाइ गर्ने उद्देश्यले योजनाको निर्माण सुरु भएको थियो । तत्कालीन राष्ट्रिय पञ्चायत सदस्य दीपबहादुर सिंहको पहलमा योजनाको निर्माण कार्य सुरु भएको थियो । नायकबाडा सिँचाइ योजना निर्माणका क्रममा दर्जन ठेकेदार बदलिएको बारेकोट गाउँपालिका–५ का वडाध्यक्ष अजवीर सिंहले बताए ।

तत्कालीन जिल्ला विकास समिति, सिँचाइ कार्यालयलगायत निकायबाट दुई÷तीन वर्षको अवधिमा बोलपत्र हुने र ठेकेदार बदलिने तर निर्माण कार्यले गति नलिने गरेपछि योजना अलपत्र परेको उनले जानकारी दिइन् । उनले भने, ‘बारेकोट–४ स्थित दह खोलाबाट पानी ल्याएर मैना, पाखा, गैरीगाउँ, साउबाडा, भैलोखान, तोलखान, घाटलगायतका स्थानको २०० हेक्टर खेतीयोग्य जमिनमा सिँचाइ गर्ने योजनाको लक्ष्य रहेको थियो ।’

योजनाको छ किलोमिटर लम्बाइ कुलोमध्ये ६० प्रतिशत ट्र्याक खोल्नेकार्य पूरा भइसकेको छ । कुलोको बीचमा निर्माण नहुँदा समस्या उत्पन्न भएको छ । झन्डै ४० वर्षको अवधिमा उक्त योजनामा १२ करोड रुपैयाँभन्दा बढी खर्च भइसकेको छ । समयमा कुलो निर्माण नहुँदा र सिँचाइ अभावले वडा नं ४ र ५ का बासिन्दाको खेतीयोग्य जमिन बाँझो छ । सिँचाइ अभावमा बारेकोट क्षेत्रमा उत्पादन न्यून भई बर्सेनि खाद्य अभाव हुने गरेको छ ।

सिँचाइ विकास डिभिजन कार्यालयले पनि नायकबाडा सिँचाइ योजनाका लागि आर्थिक वर्ष २०७३÷७४ देखि हालसम्म एक करोड खर्च गरिसकेको भए पनि कामको उपलब्धि देखिएको छैन । डिभिजन कार्यालयले छ किलोमिटर लम्बाइको कुलो ५ करोड ४८ लाख लागतमा निर्माण गरी १२० हेक्टर जमिनमा सिँचाइ सुविधा उपलब्ध गराउने लक्ष्य राखेको छ ।

उक्त कुलो निर्माणका लागि कार्यालयले २ करोड ५९ लाख लागतमा बोलपत्र सम्झौता गरेको समय दुई वर्ष बितिसकेको छ । कार्यालयले कुलो निर्माणका लागि काश्यप निर्माण सेवा एन्ड सप्लायर्ससँग सम्झौता गरेको थियो । कार्यालयले उक्त निर्माण सेवा एन्ड सप्लायर्सलाई ३० लाख पेस्की रकम दिइएको थियो ।

उक्त निर्माण कम्पनीले गत आर्थिक वर्षमा योजनाको बाँधस्थलको कार्य मात्र गरेको छ । त्यस्तै योजनाको उपभोक्ता समितिले गत आर्थिक वर्षसम्म ४५ लाख बढी रकम भुक्तानी लिएको पाइएको छ । बजेट अभावमा उक्त योजनाको निर्माण कार्यले गति लिन नसकेको कार्यालयका निमित्त डिभिजन प्रमुख रामचन्द्र साहले बताए ।

चालु आर्थिक वर्षमा उक्त सिँचाइ योजनाका लागि ४ करोड ८८ लाख बजेट माग गरेकामा आठ लाख मात्र निकासा आएको प्रमुख साहले जानकारी दिए । चालु आर्थिक वर्षको असारमा निर्माण कार्य सम्पन्न गर्नुपर्ने सिँचाइ योजनामा थप बजेट नआउँदा समस्या भएको उनले बताए । हालसम्म योजनाको १२ प्रतिशत मात्र प्रगति भएको उनले जानकारी दिए । (रासस)

प्रकाशित समय १४:२२ बजे