कास्की प्रहरीले करिब १५ महिनापछि पोखराका विभिन्न वडामा चोरी गर्दैै हिँड्ने किशोर थापासहित २ जनालाई पक्राउ गरेको छ । पोखराका ११ वटा वडा कार्यालयमा चोरी गर्ने काठमाडौं ११ घर भई हाल पोखरा १० कालिकाचोक बस्दै आएका ५१ वर्षीय थापा र चोरीका सामान खरिद गर्ने मकवानपुर १२ घर भई काठमाडौं कम्प्युटर सोलुसन पसल सञ्चालक ३६ वर्षीय रुपचन्द्र गोपालीलाई कास्की प्रहरीले पक्राउ गरेको हो ।

पोखरामा वडा कार्यालय चोरी भएको करिब १५ महिनापछि कास्की प्रहरीले चोरीमा संलग्न र सामान खरिद गर्ने थापा र गोपाली दुवै जनालाई बुधबार पत्रकार सम्मेलन गरी सार्वजनिक गरेको छ । प्रहरीले थापालाई पोखरा ६ लेकसाइडबाट र गोपालीलाई काठमाडौं उनकै निवासबाट नियन्त्रणमा लिएको हो । हाल थापा र गोपालीलाई चोरी तथा डाँकासम्बन्धी कसुर मुद्दा दर्ता गरी वडा प्रहरी कार्यालय बैदामको हिरासतमा राखिएको कास्कीका प्रहरी प्रमुख एसपी दानबहादुर कार्कीले जानकारी दिए ।

२०७५ जेठ २ गते पोखरा १२ माटेपानीको वडा कार्यालयबाट चोरीको सुरुवात भएको थियो भने २०७६ साउन २१ गते पोखरा ६ को वडा कार्यालयमा चोरी भएको थियो । साउन २६ गते वडा प्रहरी कार्यालय बैदामबाट खटिएको प्रहरीको विशेष अनुसन्धान टोलीले पोखरा ६ सहिदचोकबाट किशोर थापालाई शंकास्पद व्यक्तिको रुपमा नियन्त्रणमा लिएर सोधपुछपश्चात उनी पोखराका वडा कार्यालयमा चोरी गर्न संलग्न भएको खुलेको एसपी कार्कीले बताए । पोखराका १५, १४, २९, ५, १३, १९, ३१, १६, २५ को वडा कार्यालयमा चोरी भएको थियो ।

सिसि क्यामरा फुटेज र लगाएको कपडाका आधारमा उनीलाई पक्राउ गर्न थप सहज भएको उनले जनाए । चोरी गरेका कम्पुटर, ल्याप्टप, क्यामरासहितका वस्तु थापाले काठमाडौैं कलंकीमा गोपालीले सञ्चालन गरेको कम्प्युटर सलुसनले खरिद गर्ने गरेको प्रहरी अनुसन्धानबाट खुलेको छ ।

थापा यसअघि डाँका चोरी मुद्दामा काठमाडौं केन्द्रीय कारागारमा ५ वर्ष सजाय (२०४६–२०५१ सम्म), चोरी मुद्दामा केन्द्रीय कारागारमै ३ वर्ष (२०७१–२०७४ सम्म) सजाय भोगिसकेको प्रहरीले जनाएको छ । वडा कार्यालयमा सुरक्षा गार्डहरु कोही नहुने हुँदा कार्यालयमा चोर्न सजिलो हुने भएकाले राति करिब ११ः३० देखि १२ः३० बजेको समयमा अधिकांश वडामा चोरी गरेको थापाले प्रहरीलाई दिएको बयानमा उल्लेख छ ।

थापाको कोठाबाट कालो रंगको झोलामा लुकाएर राखेको अवस्थामा एक थान तोसिवा ल्यापटप, चार्जर एक थान, सोनी क्यामरा एक थान, फलामको रड २ थान, स्क्रु ड्राइभर एक थान, कालो पञ्जा २ जोर र कालो मास्क एक थान बरामद गरिएको प्रहरीले जनाएको छ । त्यसैगरी, गोपालीले सञ्चालन गर्दै आएको कम्प्युटर सोलुसनबाट विभिन्न कम्पनीका ल्यापटप ३ थान, सिपियु ९ थान र मनिटर १७ थान चोरीका सामान बरामद गरेको प्रहरीले जानकारी गराएको छ ।

बरामद भएका सामान सम्बन्धित व्यक्ति तथा संस्थालाई पहिचान खुलेका आधारमा प्रदान गरिने एसपी कार्कीले जानकारी दिए । चोरी भएका अधिकांश सामान प्रहरीले बरामद गरिसकेको जनाएको छ ।

प्रकाशित समय १५:२७ बजे