म्याग्दीको अन्नपूर्ण गाउँपालिका–५ खयरस्थित खर्कमा चट्याङ पर्दा १० लाख रूपैयाँ बराबरको क्षति भएको छ । शुक्रबार राति ११ः३० बजे परेको चट्याङमा परेर खर्कमा बास बसालिएका ६१ वटा भेडा मरे ।

भेंडा मरेपछि करिब १० लाख रूपैयाँ बराबरको क्षति भएको कृषकसमेत रहेका वडा सदस्य राजेश तिलिजा पुनले जानकारी दिए । सबैभन्दा धेरै तिलिजाका २६ वटा भेडा मरे । लालवीर तिलिजा, मीनबहादुर गुरुङ, टिकजित तिलिजा, यामबहादुर पाइजा, डिलप्रसाद शेरपुञ्जा र कमल तिलिजाका भेंडा पनि त्यस घटनामा मरे ।

एउटा भेंडाको मूल्य १५ हजारदेखि २५ हजार रूपैयाँसम्म पर्छ । गोठालाले सबै भेंडा एउटै खर्कमा राखेका थिए । घार प्रहरी चौकीबाट प्रहरी टोली घटनास्थल गएको छ । पाउद्वार गाउँदेखि खयर पुग्न करिब १२ घण्टा उकालो हिँड्नुपर्छ । पीडित कृषकले क्षतिपूर्ति र घुम्ती गोठमा पालिने भेंडाबाख्राको पनि बिमा हुनुपर्ने माग गरेका छन् । (रासस)

प्रकाशित समय १२:२६ बजे